माला कर्ण
सप्तरी, फागुन ३ गते । विभिन्न तेस्रो मुलुकबाट आएका सहभागीहरुलाई फिर्ता पठाएर मुस्लिम समुदायको धार्मिक सम्मेलन इज्तिमा शनिबारबाट सप्तरीको बोदेबरसाइन नगरपालिका–५ जाजरमा शुरु भएको छ । आयोजकले शुरुमा नेपाल सरकारलाई नेपाल तथा भारतका सहभागी मात्र हुने बताएर अनुमति लिएको र पछि तेश्रो मुलुकका पनि सहभागी आएपछि सम्मेलन स्थगित गर्न गृह मन्त्रालयबाट आदेश आएपछि विवादित बनेको थियो ।
फागुन ३ गतेदेखि तीन दिन चल्ने सम्मेलनका लागि खड्ग नदी किनारस्थित जाँजरमा ठूलो पण्डाल लगाएको छ । करिब २ लाख मुसलमान सहभागी रहेको उक्त इस्लामिक सम्मेलनमा नेपाल तथा भारतका विभिन्न धर्मगुरुहरुले सम्बोधन गर्ने कार्यक्रम छ । कार्यक्रमका लागि करीब २ करोड खर्च गरी झण्डै २ सय बिगहा जग्गामा २१ लाख ६० हजार स्क्वायर फिटको पण्डाल र टहरा निर्माण गरिएको छ भने साना ठूला गरी करीब २ हजार शौचालय निर्माण गरिएको स्थानीयले जानकारी दिए। करीब डेढ लाख सहभागी आइसकेको छ।
कार्यक्रममा पाकिस्तान, बंगलादेश, साउदी अरेबिया, मलेसिया र थाइल्यान्डलगायतका मुलुकबाट आएका सहभागीहरुलाई शुक्रबार साँझ आयोजकले फिर्ता पठाएपछि शनिबारबाट सम्मेलन सुरु भएको हो । यद्यपि सप्तरी सदरमुकाम राजविराजका एक होटेलमा अझै पनि केही पाकिस्तानी नागरिकहरु रहेको सुरक्षा स्रोतले जानकारी दिएको छ ।सम्मेलनलाई ध्यानमा राख्दै व्यापक संख्यामा नेपाल र सशस्त्र प्रहरी परिचालन गरिएको प्रहरी प्रमुख प्रहरी उपरीक्षक कृष्ण प्रसार्इंले जानकारी दिनुभएको छ। जिल्लाका सुरक्षा प्रमुखहरु आफैले पनि सम्मेलनस्थलको सुरक्षाको कमाण्ड सम्हालेका छन् ।
इस्लामिक सम्मेलनबारे भारतीय सुरक्षा अधिकारीहरुले पनि चासो देखाएका छन् । शुक्रबार दिउँसो सीमावर्ती लौकही थानाका प्रमुख अरविन्दकुमार इलाका प्रहरी कार्यालय बोदेबरसाइनमा आएर सप्तरीका प्रहरी नायव उपरीक्षक तिलक भारतीसहितका सुरक्षा अधिकारीहरुलाई भेटी सम्मेलनबारे छलफल गरेका थिए । थाना प्रमुख अरविन्दकुमारले सम्मेलनमा आएका पाकिस्तानी नागरिकको घुसपैठ भारततर्फ हुन सक्ने भएकोले आफूुहरुको चासो बढाएको बताएका थिए ।
आयोगका अध्यक्ष समिम अंसारीले शुक्रवार साँझ इज्तिमास्थल बोदे बरसाईन नगरपालिका वडा नम्बर ५ बोदे बरसाईनमा सुरक्षा निकायका प्रमुखहरुसँगको छलफलमा आयोजकले तेस्रो मुलुकको सहभागीलाई बोलाई गल्ती गरेको बताएका थिए। सरकारले राष्ट्रियस्तरमा सम्मेलन गर्न अनुमति दिएपनि आयोजकले अन्तर्राष्ट्रियस्तरको सम्मेलन गर्ने तयारी गरेपछि समस्या उत्पन्न भएको जनाएको थियो।
यसअघि माघ ६ गते गृह मन्त्रालयले नै जिल्ला प्रशासन कार्यालय सप्तरीलाई पत्राचार गरी उक्त कार्यक्रमको सुरक्षा मिलाउन आदेश दिएको थियो।
यता मुस्लिम समुदायको सो सम्मेलनमा हिन्दुसमुदाय तथा सञ्चारकर्मीहरुलाई समेत प्रवेश गर्न दिएको छैन।
२०८२ भाद्र १५ आईतवार
