जनार्जन खत्री
सर्लाही, फागुन ७ गते । नेकपा (एमाले) का महासचिव शङ्कर पोखरेलले संसदमा अमेरिकी अनुदान मिलेनियम च्यालेन्ज कर्पोरेशन (एमसीसी) पेश भएमा एमाले सो प्रक्रियामा सामेल नहुने बताउनुभएको छ ।
सर्लाही सदरमुकाम मलङ्गवामा शनिबार भएको एमाले सर्लाहीको आठौँ जिल्ला अधिवेशन उद्घाटन समारोहलाई सम्वोधन गर्नुहुँदै महासचिव पोखरेलले सो कुरा बताउनुभयो । प्रक्रियामै सामेल नुहने भएपछि एमालेले एमसीसीबारे के गर्छ भन्ने प्रश्नको अर्थ नहुने उहाँको भनाई छ ।
एमालेले कारवाहीको सिफारिस गरेका माधवकुमार नेपालसहितका १४ सांसदलाई सभामुखले कारवाही गरेको सूचना प्रकाशन नगरेसम्म संसद बैठकमा सामेल नहुने निर्णयमा एमाले दृढ रहेको उहाँले प्रष्ट पार्नुभयो ।
पोखरेलले एक जना न्यायाधीशमाथि मात्रै महाअभियोग लगाएर अदालत सुध्रिने अवस्था नरहेको पनि बताउनुभयो ।
अदालतलाई आफ्नो नियन्त्रणमा राख्ने, निर्वाचन सार्ने र अदालतमा एमालेले दर्ता गरेका मुद्दालाई प्रभावित पार्ने षडयन्त्रकासाथ महाअभियोगको प्रस्ताव दर्ता गरिएको महासचिव पोखरेलले टिप्पणी गर्नुभयो । अधिवेशन उद्घाटन समारोहमा एमालेका केन्द्रीय सचिव रघुवीर महासेठ, मधेस प्रदेश कमिटीका अध्यक्ष रामऔतार यादव लगायतले मन्तव्य राख्नुभयो ।
