सिराज खान
नेपालगञ्ज, फागुन २० गते । नेपाली काँग्रेस बाँकेको नयाँ नेतृत्व चयनका लागि बिहीबार भएको मतदानमा कुनै पनि उम्मेदवारले ५० प्रतिशत मत कटाउन नसकेपछि शुक्रबार दोस्रो चरणको मतदान सुरु भएको छ ।
बिहीबारको संस्थापन इतरका नारायणप्रसाद गौडेलले ५६९ मत ल्याउँदै पहिलो भएका थिए भने उहाँका प्रतिद्वन्द्वी बादशाह कुर्मीले ५३८ मत ल्याउनुभयो ।
त्यस्तै सभापतिका अर्का उम्मेदवार संस्थापन पक्षकै सुरेन्द्र हमालले ३१४ मत ल्याउनुभयो । बिहीबार भएको मतदानमा १४ सय ४५ जनाले मतदान गरेका थिए जसमा २४ मत बदर भएको थियो ।
जिल्ला सभापति, दुई उपसभापति, दुई सचिव तथा दुई सहसचिव र कार्यसमिति सदस्य चयन गर्न बिहीबार मतदान भएको थियो । सभापतिका लागि दोस्रो चरणको मतदान अन्तर्गत शुक्रबार पुनः मतदान भएको हो ।
बाँकेमा संस्थापन पक्ष बलियो भए पनि दुईजना उम्मेदवार हमाल र कुर्मीले आफूलाई आधिकारिक बताउँदै निर्वाचनमा सहभागी हुनुभएको हो ।
