सुरेशकुमार यादव
काठमाडौँ, असोज १० गते । नेपाल कम्युनिस्ट पार्टी (नेकपा) प्रदेश २ मा देखिएको शपथग्रहणको विवाद केन्द्रीय कार्यालयसम्म आइपुगेको छ । दुवै पक्षले केन्द्रीय कार्यालयमा पत्र दर्ता गराएर एक अर्काको राजीनामा माग गरेका छन् ।
नेकपा प्रदेश २ का कमिटीद्वारा भदौ २४ गते बर्दिवासमा आयोजना गरिएको शपथग्रहण कार्यक्रममा झडप भएको थियो । झडप भएपछि केही नेता तथा कार्यकर्ता घाइते पनि भएका थिए ।
दुवै पक्षले एकअर्काको दोष देखाउँदै एकअर्कालाई कारबाही गर्नुपर्ने माग गरेका छन् । नेकपा प्रदेश २ कमिटीका अध्यक्ष प्रभु साहलगायतका नेताहरूले बर्दिवासमा भएको विवादमा नेकपाका सचिवालय सदस्य माधवकुमार नेपाल र नेकपा स्थायी समितिका सदस्य मातृका यादवको हात रहेको भन्दै राजीनामा माग गर्नुभएको छ ।
प्रदेश अध्यक्ष प्रभु साह लगायतका नेताहरू असोज ७ गते नेकपाका अध्यक्ष पुष्पकमल दाहाल ‘प्रचण्ड’लाई भेटेर उहाँहरूको राजीनामा माग गर्नुभएको हो । भदौ २४ गते बर्दिवासमा भएको घटना सचिवालय सदस्य नेपाल र स्थायी समितिका सदस्य यादवको उक्साहटमा भएको दाबी गर्दै उहाँहरूले त्यसको छानबिन गरी उहाँ दुई जनासहित अन्य पाँच जना केन्द्रीय सदस्यलाई पनि कारबाही गर्न माग गर्नुभएको छ ।
यसअघि अर्को समूहले पनि भदौ ३१ गते नेकपा प्रदेश २ का इन्चार्ज सत्यनारायण मण्डल, सहइन्चार्ज विश्वनाथ साह, अध्यक्ष प्रभु साह, सचिव सुमन प्याकुरेलको राजीनामा माग गर्दै केन्द्रीय कार्यालयमा पत्र दर्ता गराउनुका साथै अध्यक्ष प्रचण्ड र महासचिव पौडेललाई पनि बुझाउनुभएको थियो ।
प्रदेश २ सहइन्चार्जहरू महेन्द्र पासवान, नागेन्द्र चौधरी, केन्द्रीय सदस्यहरू रामचन्द्र झा, गोपाल ठाकुर, रामचन्द्र यादव, श्रीप्रसाद साहलगायत १६ जनाले हस्ताक्षर गरी सो पत्र बुझाउनुभएको थियो । सहइन्चार्ज महेन्द्र पासवानले नेकपा प्रदेश २ कमिटीका पदाधिकारीहरूले जिल्ला कमिटी गर्दा जथाभावी गर्नुभएका कारण आफूहरूले उहाँहरूको राजीनामा माग गर्दै पार्टीलाई पत्र बुझाएको बताउनुभयो । प्रदेश २ को जिल्ला कमिटी अनियमित ढङ्गबाट गठन भएको र त्यसलाई सच्याउन केन्द्रीय सचिवालयले पटक पटक निर्देशन दिँदा पनि प्रदेश कमिटीका पदाधिकारीहरूले जबर्जस्ती शपथग्रहण गराउनु भएको हुनाले त्यसलाई रद्द गर्न आफूहरूले माग गरेको उहाँले बताउनुभयो ।
प्रदेश अध्यक्ष साहले सप्तरी र सिरहा कमिटीको शपथग्रहण कार्यक्रम महोत्तरीको बर्दिवासमा राख्दा केन्द्रीय अध्यक्ष प्रचण्ड र महासचिव विष्णुप्रसाद पौडेलले कार्यक्रम स्थगित गरी जिल्ला कमिटीलाई सुधार गर्न निर्देशन दिनुभएको थियो तर अध्यक्ष साहले अटेरी गरी जबर्जस्ती कार्यक्रम आयोजना गर्नुभएको आरोप ज्ञापनपत्रमा लगाइएको छ ।
प्रदेश २ का इन्चार्ज सत्यनारायण मण्डलले पार्टीले बनाएको मापदण्ड र निर्देशिका अनुसार जिल्ला कमिटी गठन गरेको दाबी गर्नुभएको छ । उहाँले भन्नुभयो, ‘‘मानव हो, केही त्रुिट भएको होला, त्यसलाई सच्याउन सकिन्छ, केही सच्याएका पनि छौँ तर जुन ढङ्गको विवाद खडा गरेका छन् त्यसले कसैलाई भलो गर्दैन ।’’
