सुरेन्द्र खत्री
रुकुम (पश्चिम), असोज १५ गते । रुकुम पश्चिममा करिब पाँच किलो अफिमसहित एकजनालाई प्रहरीले पक्राउ गरेको छ । पक्राउ पर्नेमा सानीभेरी गाउँपालिका–५ गोलचौरका ३२ वर्षीय रञ्जित खत्री रहेका छन् ।
जिल्लाको बाँफिकोट गाउँपालिका–७ मग्मामा शंकास्पद तरिकाले हिँड्दै गर्दा विशेष सूचनाका आधारमा खत्रीलाई पक्राउ गरिएको प्रहरीले जनाएको छ । प्रहरीलाई देखेर खत्री भाग्न खोजेपछि एक राउण्ड हवाई फायर समेत गर्नुपरेको जिल्ला प्रहरी कार्यालय रुकुम पश्चिमका प्रमुख डीएसपी सुमित खड्काले जानकारी दिनुभयो । खत्रीको साथबाट प्रहरीले चार किलो ९०० ग्राम अफिम र तराजुलगायतका सामाग्रीहरु पनि बरामद गरिएको उहाँले बताउनुभयो ।
खत्रीलाई प्रहरी हिरासतमा राखी थप अनुसन्धान गरिरहेको छ । बाँफीकोट गाउँपालिकाको मग्मा, नदुवालगायतका क्षेत्रमा अवैध लागूऔषध ओसारपसार तथा बिक्री भइरहेको सूचनाको आधारमा प्रहरीले यस क्षेत्रमा सतर्कता अपनाएको छ ।
२०८१ मंसिर ८ शनिवार
