होमराज रानाभाट
नवलपरासी,कात्तिक १७ गते । पूर्वी पश्चिम राजमार्ग अन्तरगत पूर्वी नवलपरासीको विनयी त्रिवेणी गाउँपालिका १ अरुणखोला र दुम्किबासबीच जंगलमा शनिबार राती भएको सवारी दुर्घटनामा एक जनाको मृत्यु भएको छ ।
इलाका प्रहरी कार्यालय दुम्किबासका अनुसार पूर्वबाट पश्चिमतर्फ जाँदै गरेको लु १ च ९२४३ नम्बरको बलेरो जिप गए राती १२ बजे आफै अनियन्त्रित भई सडकबाट दायाँ साइडमा रहेको रुखमा ठक्कर खाएको थियो ।
दुर्घटनामा परी बलेरोमा सवार पश्चिम नवलपरासीको बर्दघाट नगरपालिका ४ बस्ने बर्ष ३० का ढाकाराम पंगेनीको निधन भएको हो । गम्भीर घाइते पंगेनीको पुरानो मेडिकल कलेज चितवनमा उपचारको क्रममा आज बिहान निधन भएको प्रहरीले जनाएको छ ।
प्रहरीका अनुसार दुर्घटनामा परी बलेरो चालक पूर्वी नवलपरासीको गैडाकोट नगरपालिका ८ निवासी ३२ बर्षीय सन्तोष डमरकोटी गम्भीर घाइते भएका छन् । घाइतेको पुरानो मेडिकल कलेज भरतपुरमा उपचार भईरहेको छ ।
यसै गरि गैंडाकोटमा भएको अर्को सवारी दुर्घटनामा गैंडाकोट नगरपालिका १० का पुर्ण परियारको ज्यान गएको गैंडाकोट ईलाका प्रहरी कार्यालयले जनाएको छ । शनिबार साँझ गैंडाकोटको शिव आयल अगाडि मोटरसाईकलले ठक्कर दिदाँ परियारको उपचारका क्रममा आज भरतपुर अस्पतालमा मृत्यु भएको प्रहरीले जनाएको छ ।
