जनार्जन खत्री
सर्लाही, माघ २ गते । सर्लाहीको कविलासी नगरपालिका–५, रनियाबाट प्रहरीले लुटपाटमा संलग्न एक युवकलाई पक्राउ गरेको छ ।
पक्राउ पर्नेमा जिल्लाको बसबरिया गाउँपालिका–४, धनगढा गुनर्वा टोलका १९ वर्षीय रोहितकुमार साह रहेका छन् । बुधबार राती करिब १० बजे हरिपुर नगरपालिका–७, पचगछियामा लागेको माघी मेला भरेर घर फर्किदै गरेका एक जनालाई रनिया गाउँमा नियन्त्रणमा लिई लुटपाट गर्दै गर्दा प्रहरीले साहलाई पक्राउ गरेको हो ।
लुटपाटमा संलग्न अन्य पाँच जना फरार भएका र उनीहरुको खोजी तीब्र पारिएको ईलाका प्रहरी कार्यालय हरिपुरका प्रहरी निरीक्षक विक्रम साहले जानकारी दिनुभयो । प्रहरी निरीक्षक साहका अनुसार घटनास्थलबाट लुटेराको समूहले प्रयोग गरेको बीआर ३० भी ८३०७ र बीआर ३० यू ०७५९ नम्वरको दुई वटा मोटरसाइकल बरामद भएको छ ।
कविलासी नगरपालिका–५, स्थित रनियामा यसअघि समेत पटक–पटक लुटपाटका घटना भइरहेका छन् । केही समयअघि मात्रै त्यस ठाउँमा लघुवित्तका दुई कर्मचारी लुटिएका थिए । बुधबार राती पक्राउ परेका साहको यसअघि भएका लुटपाटका घटनामा संलग्नता रहे÷नरहेको सम्बन्धमा अनुसन्धान भइरहेको प्रहरी निरीक्षक साहले बताउनुभयो ।
हरिपुरमा भर्खरै सरुवा भएर आउनु भएका प्रहरी निरीक्षक साहले पुराना फाइल हेरेर अपराध नियन्त्रण र फरार अभियुक्तको खोजी अभियान तीब्र पार्ने बताउनु भएको छ ।
