टीकाबहादुर बस्नेत
दाङ, चैत २७ गते । कोरोना विशेष अस्पताल बेलझुण्डीमा भेन्टिलेटरसहितको आई.सी.यू. सेवा सुरु भएको छ । कोरोनाको उच्च जोखिममा दाङ पनि पर्ने कोरोना विशेष अस्पतालमा भेन्टिलेटरसहितको आई.सी.यू सेवा सुरु गरिएको कोरोना संक्रमण रोकथाम तथा नियन्त्रण जिल्ला स्तरीय समितिका सूचना अधिकारी कमल चन्दले जानकारी दिनुभयो ।
कोरोना भाइरसका बिरामीको उपचारलाई मध्यनजर गर्दै ५ बेडको आई.सी.यू., २ वटा भेन्टिलेटर र ३ वडा मनिटर जडान गरेको भन्दै सूचना अधिकृत चन्दले हालसम्म आई.सी.यू. मा राख्नुपर्ने अवस्थाका कुनै पनि बिरामी नरहेको जानकारी दिनुभयो । राप्ती प्रादेशीक अस्पतालमा रहेका सामग्री लिएर आई.सी.यू. बेड सञ्चालनमा ल्याइएको चन्दले जानकारी दिनुभयो । ‘आई.सी.यू. सञ्चालनका लागि सामग्री खरिद गर्न खोलिएको टेण्डरमा मूल्य उच्च रहेकाले उक्त टेण्डर रद्द गरी पूनः टेण्डर खोलिदैछ’, चन्दले भन्नुभयो, ‘राप्ती प्रादेशीक अस्पतालमा रहेका सामग्री लिएर भेण्टिलेटरसहितको आई.सी.यू. सञ्चालनमा ल्याइएको छ ।’
कोरोना भाइरसको आशंकामा २० जनाको स्वाब परिक्षणका लागि काठमाडौँ पठाइएको सूचना अधिकारी चन्दले जानकारी दिनुभयो । कोरोना विशेष अस्पताल बेलझुण्डीको आइसोलेसनमा रहेका दाङका १५ र प्यूठानका ५ जनाको नमुना संकलन गरी काठमाडौँ पठाइएको चन्दले जानकारी दिनुभयो । भैरहवास्थित प्रदेशस्तरिय कोरोना परिक्षण प्रयोगशालामा ढिलाइ हुने भएकाले नमुना परिक्षणका लागि काठामाडौँ पठाइएको चन्दको भनाइ छ ।
आइसोलेनमा भर्ना भएकामध्ये एक जना राप्ती प्रादेशीक अस्पतालमा कार्यरत कर्मचारीसमेत रहेको कोरोना विशेष अस्पतालका सदस्य सचिव डा. सर्वेश शर्माले जानकारी दिनुभयो । भारतलगायत अन्य मुलुकबाट आएका २० जनामा कोरोना भाइरसको आशंका गरी स्वाब परिक्षणका लागि पठाइएकोमा शुक्रबार रिपोर्ट आउने डा. शर्माले जानकारी दिनुभयो ।
कोरोना सङ्क्रमित युवासँगै आएका युवाको खोजी तीब्र
धनगढीका कोरोना सङ्क्रमित युवासँगै कैलालीको गौरीफन्टा नाकाबाट आएका दाङका २ जनाको खोजी कार्य जारी रहेको सूचना अधिकारी चन्दले जानकारी दिनुभयो । गत चैत १२ गते गौरिफण्टा नाका हुँदै जिल्ला भित्रिएका १० जनामध्ये २ जना अझै फेला नपरेको चन्दले जानकारी दिनुभयो । ८ जना युवालाई कोरोना विशेष अस्पतालमा राखिएको भन्दै चन्दले अन्य २ जनाका परिवारले घर आई नपुगेको जानकारी दिएको बताउनुभयो ।
प्रहरीलाई मास्क र ग्लोब्स प्रदान
विश्वब्यापी महामारीका रुपमा फैलिदै गएको कोरोना भाइरसको महामारीबाट प्रहरी प्रशासनलाई बचाउन मास्क र पञ्जा बितरण गरिएको छ । दाङका युवा व्यवसायी बालकुमार घर्ती मगर र नेपाल कम्युनिष्ट पार्टी (नेकपा) का जिल्ला सचिवालय सदस्य मनोहर बुढाथोकीले जिल्ला प्रहरी प्रमुख जनक भट्टराईलाई बिहीबार मास्क र ग्लोब्स हस्तान्तरण गर्नुभएको हो ।
नेपाल पत्रकार महासंघ दाङका अध्यक्ष सविन प्रियासनको पहलमा जिल्ला प्रहरी कार्यालय दाङलाई मास्क र ग्लोब्स उपलब्ध गराइएको हो । कोरोना भाइरसको महामारीबाट नागरिकलाई बचाउन नेपाल सरकारले सुरु गरेको लकडाउनलाई सफल बनाउन अहोरात्र खटिदै आएको प्रहरी प्रशासनलाई कोरोना भाइरसको संक्रमणबाट बचाउन मास्क र ग्लोब्स उपलब्ध गराएको व्यवसायी घर्ती मगरले जानकारी दिनुभयो ।
युनाइटेड साइन्टिफिक एण्ड सर्जिकल हाउस प्रा.लि.को तर्फबाट जिल्ला प्रहरी कार्यालयलाई २ हजार प्रति इक्जामिनेशन ग्लोब्स् र २ सय प्रति नन ओभन मास्क उपलब्ध गराएको व्यवसायी घर्ती मगरले जानकारी दिनुभयो । ‘बजारमा मास्क र ग्लोब्स विना ड्यूटी गरिरहेका प्रहरीहरुलाई देख्दा उहाँमा कोरोनाको उच्च जोखिम रहने आशंकाले हामीले मास्क र ग्लोव्स उपलब्ध गराएका हौं’, प्रालिका सञ्चालक समेत रहनुभएका घर्ती मगरले भन्नुभयो, ‘जोखिमपूर्ण काममा अहोरात्र खटिने प्रहरी प्रशासनप्रति सम्मान प्रकट गर्दै सानो सहयोग प्रदान गरेका हौं ।’
