प्रकाशचन्द्र भट्टराई
दमौली, बैशाख १ गते । विश्व व्यापी माहामारीको रुपमा फैलिरहेको कोरोना भाइरसको संक्रमण र जोखिम न्युनिकरण गर्न लागु गरिएको लकडाउनले समस्यामा परेका देवघाट गाउँपालिका अन्तर्गत रहेका असंगठित क्षेत्रमा कार्यरत दैनिक ज्यालादारीमा काम गर्ने श्रमिक वर्ग तथा असहाय र विपन्न नागरिकहरुलाई दैनिक जीवन यापनकालागि राहत सामग्री उपलब्ध गराउनका देवघाट गाउँपालिका वडा नं. ५ स्थित बिभिन्न सामुदायिक वनहरुले आर्थिक सहयोग गरेका छन् ।
वडा नम्बर ५ अन्तर्गतका ७ वटा सामुदायीक वनले राहत रकमको चेक वडा अध्यक्ष यालबहादुर गुरुङ मार्फत गाउँपालिकालाई हस्तान्तरण गरेका छन् । उक्त रकमको चेक आईतबार वडा अध्यक्ष गुरुङले गाउँपालिकाका प्रमुख प्रशासकीय अधिकृत रमेश सुवेदीलाई हस्तान्तरण गर्नु भयो । गाउँपालिका भित्रका विपन्न र असहाय नागरिकलाई दैनिक गुजाराकोलागि सहयोग गरेको गाउँपालिकाको सामुदायीक वन उपभोक्ता महासंघका अध्यक्ष भोजराज नैनावस्तीले बताए ।
राहत कोषमा मधुवन सामुदायिक वनले १ लाख, चौकीडाँडा सामुदायिक वनले ५० हजार, सोलीघोप्टे सामुदायिकले ५० हजार, चक्रवर्ती सामुदायिक वनले ५० हजार, देउती सामुदायिक वनले ५० हजार, सिता सामुदायिक वनले ५० हजार, र कालिका सामुदायिक वन उपभोक्ता समितिले ५० हजार रुपैयाँ प्रदान गरेका थिए ।
गाउँपालिकाका प्रमुख प्रशासकीय अधिकृत रमेश सुवेदीले अहिलेको विपद्को समयमा सबैले सहयोग गर्नु पर्ने भन्दै सहयोग गर्न चहानेले गाउँपालिकाको राहत कोषमा जम्मा गर्न सक्ने बताउनु भयो । वडा अध्यक्ष गुरुङले सामुदायीक वनको सहयोग अतुलनीय भएको बताउनु भयो ।
