देवराम प्रसाद यादव
सप्तरी बैशाख ५ गते । कोरोना भाइरस कोभिड १९ को संक्रमणलाई नियन्त्रण गर्न आव्हान गरिएको लकडाउनको अवस्थामा अति आवश्यक खाद्यान्न भन्दै ट्रयाक्टरमा लोड गरी मदिरा लैजाने क्रममा सप्तरीमा एक जनालाई प्रहरीले पक्राउ गरेको छ ।
महादेवा गाँउपालिका वडा नम्वर १ निवासी ३२ वर्षिय श्रवण मण्डललाई प्रदेश २–०१–००१ त ०५२८ नम्बरको ट्रयाक्टरसहित वडा प्रहरी कार्यालय राजविराजबाट खटिएको प्रहरीले नियन्त्रणमा लिएको हो । बिहीबार बिहान करिब ५.३० बजेको समयमा सोधपुछ गर्दा अत्यावश्यक बस्तु खाद्यान्न हो भनी बहाना बनाई लैजाने क्रममा शंका लागेर प्रहरीले चेकजाँच गरेको थियो ।
कुनै पनि बिल भरपाई बिना नै अवैध रुपमा विभीन्न ब्राण्डका मदिराहरु लोड गरेर लगिरहेको पाईएको थियो । उक्त ट्रयाक्टरबाट दिलेवाले नामक मदिरा ९० कार्टुन, एम्बिसन नामक मदिरा २० कार्टुन, गोल्डहली नामक मदिरा ६ कार्टुन बरामद गरिएको छ ।
ट्रयाक्टर सहित चालक मण्डललाई आवश्यक कारवाहीकोलागि जिल्ला प्रशासन कार्यालय पठाईएको जिल्ला प्रहरी कार्यालय सप्तरीका प्रहरी नायव उपरीक्षक तिलक भारतीले जानकारी दिएका छन् ।
