प्रकाशविक्रम शाह
धनगढी, वैशाख ८ गते । कैलालीको मोहन्याल गाउँपालिका –३ फल्लेबिसौनास्थित चन्चल भनिने चन्द्रराज गिरीको घरबाट अबैध भरुवा बन्दुक बरामद भएको छ । तर गिरी भने फरार रहेका छन् ।
बन्दुक लुकाई छिपाई राखेको छ भन्ने गोप्य सूचनाको आधारमा ईलाका प्रहरी कार्यालय बौनियाबाट प्रहरी निरीक्षक अनिस भण्डारीको टोलीले घर भित्र लुकाई छिपाई राखेको एक थान दुईनाले भरुवा बन्दुक सहित गिरीलाई पक्राउ गरिएको हो ।
गिरीको घरबाट अन्दाजी ३६.९ क्युफिट सालको काठ समेत बरामद भएको छ । प्रहरीले गिरीकी ४५ वर्षीय धनसरा गिरीलाई नियन्त्रणमा लिएको जिल्ला प्रहरी कार्यालय कैलालीका प्रहरी नायव उपरीक्षक तथा प्रवक्ता दक्षकुमार बस्नेतले बताउनुभयो । फरार रहेका गिरीको खोजी कार्य भइरहेको र बन्दुक र काठ बारे थप अनुसन्धान कार्य भइरहेको उहाँले बताउनुभयो ।
