शेरबहादुर सार्की
बाजुरा, असोज १६ गते । जिल्लाको पूर्वीउत्तर क्षेत्रमा रहेको हिमाली गाउँपालिको कवाडी नदीमा डुबेर एकै परिवारका पाँचजना बेपत्ता भएका छन् ।
बेपत्ता हुनेमा हिमाली गाउँपालिका वाड नं ५ कवाडीका ३० वर्षीया सत्ता नेपाली, पाँच वर्षीया आरती नेपाली, चार वर्षीया सन्तोषी नेपाली, दुई वर्षका सम्मान नेपाली र एक वर्षीया किस्मती नेपाली रहेको जिल्ला प्रहरी कार्यालय बाजुराले जनाएको छ । शुक्रबार दिउँसो २ बजे कवडी खोलामा नुहाउन गएका बेला आमासहित तीन छोरी र एक छोरा बेपत्ता भएका हुन् ।
प्रहरीको टोली कवाडी खोलामा पुगेर बेपत्ता भएकाहरुको खोजी कार्य गरी रहेको जिल्ला प्रहरी कार्यालय बाजुराका सूचना अधिकारी लोकेन्द्रसिंह ठगुन्नाले बताउनुभयो ।
सोही खोलामा यसअघि पनि एक बालिका नुहाउने क्रममा खोलाले बगेर बेपत्ता भएकी थिइन् ।
