ठाकुरप्रसाद आचार्य
म्याग्दी, मंसिर २४ गते । परिश्रम गर्न सके आफ्नै माटोमा पनि राम्रो आम्दानी गर्न सकिन्छ भन्ने उदाहरण बन्नुभएको छ म्याग्दीको बेनी नगरपालिका ९ घतानका सागर बानियाँ । बानियाँले नर्सरी ब्याडबाट फलफुल र जडीबुटीका विरुवा गरी वार्षिक रुपमा ७० लाख बराबरको विरुवा बिक्री गर्नुहुन्छ । उहाँको नर्सरी ब्याडमा सतुवा, टिमुर, लोडसल्ला, रोजमेरी, दाँतेओखर, किबी, चिराइतो लगायत करिब तीन लाख जति बिरुवा छन् ।
विरुवा उत्पादन गर्न व्यवस्थित रुपमा ब्याड बनाउनुभएको छ । बानियाँले प्रशंसा बहुउद्देयीय नर्सरी ब्याड दर्ता गरी व्यवसायिक रुपमा विरुवा उत्पादन गर्न थाल्नुभएको हो । रोजगारीका क्रममा तीनवर्ष बहराइनमा बिताउनुभएका बानियाँले स्वदेश फर्किएर बुबाको पेशालाई निरन्तरता दिनुभएको हो ।
म सानै हुँदा बुवाले अलिअलि बिरुवा उत्पादन गरेर विक्री गर्ने गर्नुहुन्थ्यो बानियाँले भन्नुभयो ‘विदेशबाट म फर्किएर आएपछि व्यवसायिक रुपमा विरुवा उत्पादन गर्न थालेको हुँ ।’ बुवाले गरेको निर्वाहमुखी पेशालाई मैले व्यवसायिक बनाएको बानियाँले बताउनुभयो ।
नर्सरी ब्याडबाट वर्षेनी ७० देखि ९० लाख रुपैयाँ सम्मका बिरुवा बिक्री गर्ने उहाँ बताउनुहुन्छ ।
म्याग्दी लगायत पर्वत, बागलुङ, कास्की, काभ्रे, वैतडी, रसुवा, इलाम, उदयपुर र लमजुङलगायतका जिल्लाबाट विरुवाको माग आउने गर्दछ ।कोरोना महामारीका कारण लकडाउन भएकाले यो वर्ष सोचे अनुसारको विरुवा बिक्री नभएको उहाँले बताउनुभयो । इलाम र उदयपुरबाट नेपाली सेनाले विरुवाको माग गरेको उहाँले बताउनुभयो ।
यसवर्ष पनि फोनबाट माग धेरै आएको छ, बानियाँले भन्नुभयो, ‘नर्सरीमा अहिले बिरुवा तयार हुँदैछन् । यो वर्ष विभिन्न थरीका गरी करिब तीन लाख विरुवा उत्पादन गर्ने लक्ष्य छ ।’सतुवाको प्रतिगोटा ४७, टिम्मुर ६०, दाँतेओखर १०० र ग्राफटिङ गरेको विरुवा ४०० टिकानोट ३०० र रोजमेरीको ४०० रुपैयाँ प्रतिगोटा पर्ने बानियाँले बताउनुभयो ।
बैतडी जिल्लाबाट टिम्मुर र सतुवाको एकलाख बिरुवाको माग आएको उहाँले बताउनुभयो । त्यहाँको वन डिभिजन कार्यालयले फोन मार्फत मौखिक सम्झौता भएको बानियाँले बताउनुभयो ।बानियाँको नर्सरी व्याडमा यतिखेर ३५ हजार टिम्मुर, दुई लाख सतुवाका विरुवा तयारी अवस्थामा छन् । कोरोना महामारीका कारण माग गरेका विरुवा पनि सप्लाई गर्न नसकिएको उहाँले बताउनुभयो । दाँते ओखरका तीन लाख बिरुवा केही महिनामा तयारी हुने उहाँले बताउनुभयो । नर्सरी व्याडमा काम गर्न सात जना महिलालाई उहाँले रोजगारी दिनुभएको छ ।
