ज्ञानु पंगेनी
कावासोती, असोज २२ गते । पूर्वी नवलपरासीमा विपद्बाट प्रभावित परिवारलाई सात लाख ५५ हजार रुपिँया राहत रकम वितरण गरिएको छ ।
हुप्सेकोट –४, माथिल्लो चारघरेका हस्तबहादुर पुलामीको परिवारलाई चार लाख रुपियाँ राहत प्रदान गरिएको हो । गत भदौ महिनामा आएको वर्षाले पहिरो जाँदा पुलामीको परिवारका तीन जना सदस्यको पहिरोमा पुरिएर मृत्यु भएको थियो ।
यस्तै हुप्सेकोट, बौदीकाली र बुलिङ्गटार गाउँपालिकाका विभिन्न ठाउँमा विपद्बाट प्रभावित परिवारलाई क्षतीको विवरणअनुसार तीन लाख ५५ हजार रुपियाँ जिल्ला विपद् व्यवस्थापन कोषबाट राहत रकम प्रदान गरिएको प्रमुख जिल्ला अधिकारी मनमाया पंगेनीले जानकारी दिनुभयो ।
अन्तर्राष्ट्रिय विपद् जोखिम न्यूनीकरण दिवसको अवसर पारेर शुक्रबार जिल्ला विपद् व्यवस्थापन समितिको आयोजनामा भएको अन्तरक्रिया कार्यक्रममा प्रजिअ पंगेनी उक्त कुराको जानकारी गराउनुभयो । घरमा आशिंक क्षती पुगेको, खेतीबारी बगाएको लगायतमा क्षती पुगेको परिवारलाई जिल्ला विपद् व्यवस्थापन कोषको मापदण्डअनुसार राहत दिन नमिल्ने हुँदा त्यस्ता परिवारका लागि स्थानीय तहले कार्यबिधि बनाएर वा विपद् कोषबाट सहयोग गर्नुपर्नेमा जोड दिनुभयो ।
हुप्सेकोट – ५ वागखोरका १८ घरपरिवारलाई टहरो निर्माण गरेर व्यवस्थापन गर्ने कार्य थालनी गरेको जानकारी दिदै उहाँले जग्गाको विषयमा विभिन्न अवरोध आउँदा काम गर्न अप्ठेरो परेको बताउनुभयो । हुप्सेकोट – ४ माथिल्लो चारघरेका पहिरो प्रभावित परिवारलाई समेत सुरक्षित स्थानमा स्थानान्तरण गर्नुपर्ने आवश्यकता रहेको उहाँले बताउनुभयो ।
कार्यक्रममा शशस्त्र प्रहरी वल ३१ नं. गुल्मका प्रमुख बिरभद्रनाथले जिल्लामा विपद न्यूनिकरण र रोकथामका लागि जिल्लाबाट भएका प्रयासका बारेमा प्रस्तुतीकरण गर्नुभएको थियो ।
कार्यक्रममा नेपाल रेडक्रस सोसाईटी जिल्ला शाखाका कोषध्यक्ष ऋषी कंडेलले विपदका वेलामा रेडक्रसले हुप्सेकोटमा बस्ती स्थानान्तरणमा खटेको, बाढी पहिरो प्रभावितका लागि राहत सामग्री सहयोग गरेको जानकारी गराउनुभयो ।
