मुना हमाल
सुर्खेत, कात्तिक १३ गते । सुर्खेतमा बाह्र वर्षदेखि मनोसामाजिक समस्या भइ बाँधेर राखिएका एक युवकको शनिबार उद्धार गरिएको छ । गुर्भाकोट नगरपालिका १ राम्रीकाँडाका ३२ वर्षीय विकास सोमैको उद्धार गरिएको हो ।
गुर्भाकोट नगरपालिकाको पहल तथा अनुरोधमा मानव सेवा आश्रम सुर्खेतले उहाँको उद्धार गरेको छ । उहाँलाई मानव सेवा आश्रम सुर्खेतमा राखिएको जिल्ला संयोजक संजिता गौतमले जानकारी दिनुभयो ।
सोमैलाई बाँधिएको अवस्थामा उद्धार गरिएको गौतमले बताउनुभयो । सोमैको घरको आर्थिक अवस्था कमजोर छ । परिवारले औषधि उपचार गर्न नसकेपछि घरमै राखेको र परिवारलाई समाल्न समस्या भएपछि बाँधेर राखिएको परिवारका सदस्यले बताएका छन् ।
