माला कर्ण
सप्तरी, कात्तिक २२ गते । सप्तरीको राजविराजस्थित चित्रगुप्त मन्दिरको चित्रगुप्तको हातमा राखिएको कलम ८६ हजार ६६६ रुपियाँमा विक्री भएको छ । चित्रगुप्त सेवा समिति सप्तरीद्वारा साँझ आयोजना गरिएको कार्यक्रममा डाक बढाबढ गरी सो कलम विक्री गरिएको समितिका अध्यक्ष अशोक कर्णले बताउनुभयो ।
सर्वाधिक रकमको बोली लगाउने राजविराज– २ का कृष्णदेव दत्तले सो कलम खरिद गर्नुभयो । डाक बढाबढ गरेर सो कलम विक्री गर्ने र कलमबाट आउने रकम शिक्षा, स्वास्थ्य र समाजसेवा लगायतका क्षेत्रमा खर्चिने अध्यक्ष कर्णले बताउनुभयो ।
भाइटीकाका दिन मनाइने पूजामा कायस्थ समुदायले आफ्ना वंशपिता चित्रगुप्त र कलमको एकसाथ पूजा गर्ने गर्छन् । सोही अवसरमा समितिले विगत ४२ वर्षदेखि कलम लिलाम गर्ने प्रतिस्पर्धा गर्दै आएको जनाएको छ ।
