सन्तोष सुवेदी
सिराहा, मङ्सिर ४ गते । पुर्वबाट पश्चिमतर्फ गइरहेको एक मोटरसाइकलमा चेकजाँच गर्नेक्रममा सिराहा प्रहरीले धनगढीचोकबाट ठूलो मात्रामा लागुऔषध बरामद गरेको छ ।
पक्राऊ हुनेमा सप्तरीको खड्क नगरपालिका– ७ का २५ वर्षीय नागेश्वर भगत र धनुषाको औरही गाउँपालिका–५ का २९ वर्षीय रमनकुमार कर्ण रहेका छन् । प्रहरीले धनगढीस्थित इलाका प्रहरी कार्यालय अगाडि गरेको चेकजाँचको क्रममा उनीहरुबाट लागुऔषध बरामद गरेको हो ।
चेकजाँचको क्रममा प्रदेश नं. ०२–०२३–प ९३९ नम्बरको मोटरसाइकल चालक नागेश्वर भगतले बोकेको झोलाबाट प्रहरीले लागुऔषध बरामद गरेको थियो । प्रहरीले उनीहरुबाट नोफिन १९४ एम्पुल, प्रोमिथोजाइन ३४२ एम्पुल, डाईजोपाम ३८२ एम्पुल र लेवल नभएको १८२ एम्पुलसमेत गरी एक हजार एक सय लागुऔषध बरामद गरेको छ ।
भगत र कर्णलाई इलाका प्रहरी कार्यालय धनगढीमा थप अनुसन्धानका लागि हिरासतमा राखिएको छ । उनीहरुको साथमा रहेको मोटरसाइकल नियन्त्रणमा लिएको जिल्ला प्रहरी कार्यालय सिराहाका प्रवक्ता तथा प्रहरी नायव उपरिक्षक सुभाष बुढाथोकीले जानकारी दिनुभयो ।
सिराहाको दक्षिणवर्ती विभिन्न सीमावर्ती नाकाबाट लुकिछिपी ठूलो परिमाणमा लागुऔषध नेपाल भित्र्याएर लहान, धनगढी, गोलबजार र मिर्चैयामा भण्डारण गर्ने गिरोह सिराहामा सक्रिय भएको पाइएको प्रहरीले जनाएको छ ।
‘हामीले बारम्बार स्थानीय प्रहरी प्रशासनसँगको भेटमा लागुऔषधमाथि नियन्त्रण गरिनुपर्छ भनेर माग गर्दै आइरहेका छौं’, सिरहा उद्योग वाणिज्य सङ्घका अध्यक्ष प्रमोद पोद्धारले भन्नुभयो– ‘सीप भएका युवाहरु विदेश पलायन भएका छन्, सीप नभएका युवाहरु लागु औषधको कुलतमा फँसेका छन् ।’
