जानु पाण्डे
कपिलवस्तु, मङ्सिर १२ गते । कपिलवस्तुको विजयनगर गाउँपालिका वडा नं. ६ फरेनी चोकमा तीन वटा मोटरसाइकल एक आपसमा जुध्दा एक जनाको मृत्यु भएको छ । आइतबार बिहान अन्दाजी १० बजे भएको दुर्घटनामा परी सोही गाउँपालिका वडा नं. ६ खजहानी डिहवाका २५ वर्षका वंशीलाल चौहानको मृत्यु भएको इलाका प्रहरी कार्यालय गणेशपुरका प्रहरी निरीक्षक रणबहादुर विष्टले बताउनुभयो ।
दुर्घटनामा गम्भीर घाइते भएका सुनिल हरिजनलाई उपचारका लागि बुटवल लगिएको छ । लु १३ प ३०९८, लु ३४ प ७०५४ र नम्बर नखुलेको मोटरसाइकल एक आपसमा ठोकिएको प्रहरीले जनाएको छ । मृतक चौहानको शवलाई पोस्टमार्टमका लागि कपिलवस्तु अस्पताल तौलिहवा लगिएको छ । घटनाको विषयमा थप अनुसन्धान भइरहेकोे प्रहरी निरीक्षक विष्टले जानकारी दिनुभयो ।
२०८१ पुष १५ सोमवार
