तिलाचन पाण्डे
तम्घास, पुस ९ गते । गुल्मीमा मोटरसाइकल दुर्घटनामा एक जनाको मृत्यु भएको छ । मोटरसाइकलमा सवार अर्का एक जना घाइते भएका छन् । जिल्लाको गुल्मी दरबार गाउँपालिकाको बीरबासबाट भेडुवातर्फ जाँदैगरेको लु १७ प ६४५२ नम्वरको मोटरसाइकल दुर्घटना हुँदा गुल्मी दरबार गाउँपालिका ४ बीरबासका ३० वर्षीय पदम ढेगाको मृत्यु भएको जिल्ला प्रहरी कार्यालय गुल्मीका प्रहरी नायब उपरीक्षक पुरुषोत्तम पाण्डेले जानकारी दिनुभयो ।
मोटरसाइकल अनियन्त्रित भई सडकदेखि करिब दूई सय मिटर तल झर्दा गम्भीर घाइते हुनुभएका ढेगाको श्रृङ्गा प्राथमिक स्वास्थ्य केन्द्रमा उपचारको क्रममा मृत्यु भएको पाण्डेले बताउनुभयो । मृतकको शवलाई घटनास्थलको मुचुल्का तयार गरी गुल्मी अस्पतालमा ल्याइएको छ । शबलाई पोष्टमार्टम गरी आफन्तको जिम्मा लगाइने पाण्डेले जानकारी दिनुभयो ।
मोटरसाइकलमा पछाडी सवार बीरबासका ३१ वर्षीय धनकुमार ढेगाको अनुहारमा सामान्य चोट लागेको र उहाँको प्राथमिक स्वास्थ्य केन्द्रमा उपचार भइरहेको जिल्ला प्रहरी कार्यालय गुल्मीले जनाएको छ । घटना बारेमा थप अनुसन्धान भइरहेको जिल्ला प्रहरी कार्यालय गुल्मीले जनाएको छ ।
