दिपकप्रसाद गौतम
वीरगञ्ज, पुस ११ गते । प्राय सुनसान रहने, कहिलेकाही मात्र भिडभाढ देखिने बिशाल कम्पाउण्डमा रहेको खाद्य व्यवस्था तथा व्यापार कम्पनी लिमिटेडको वीरगन्ज शाखामा अहिले खुट्टा राख्ने ठाँउ छैन । ठूलो क्षेत्रफल रहेको कार्यालय परिसर अहिले धान लोड भएका ट्याक्टर र गाडाले भरिभराऊ छ ।
बिहान साढे नौ बजेदेखि साँझ ६ बजेसम्म भिडभाड हुनेगरेको र कर्मचारीलाई भ्याइनभ्याई रहेको कर्मचारीको भनाई छ । बजार मूल्यभन्दा बढीमा खाद्यले धान किन्न थालेपछि धान बेच्न किसानहरुलाई चटारो भएको हो । पुस ८ गतेदेखि खाद्य व्यवस्था तथा व्यापार कम्पनी लिमिटेड वीरगञ्ज शाखाले वीरगञ्ज र आसपासका नीजि खाद्य उद्योगहरुभन्दा प्रतिक्वीन्टल पाँच छसय रुपियाँ बढीमा धान खरिद गर्न थालेपछि धान बेच्न आउने किसानको भिड लागेको हो ।
पहिलो र दोस्रो दिन १ हजार १० दशमलव ७५ क्वीन्टल सोना मन्सुली धान खरिद गरी सकिएको सो कम्पनीले बताएको छ । आईतबार दिउँसो २ बजेसम्म कार्यालय परिसरभित्र ७० भन्दा बढी ट्याक्टर लाममा रहेको लिमिटेड वीरगन्ज शाखाका कार्यालय प्रमुख विकास कटुवालले बताउनुभयो ।
किसानलाई धान बेच्न सहज र छिटो होस भनेर ३ वटा काँटा सञ्चालनमा ल्याइएको उहाँले बताउनुभयो । २५ क्वीन्टलसम्म धान ल्याएका किसानलाई छुट्टै काँटामा तत्कालै खरिद गरिदिने गरेका छौंं, भुक्तानी पनि आवश्यकता हेरर नगदमै गरिदिने गरेका छौंं उहाँले भन्नुभयो ।
कार्यालयका सूचना अधिकृत मुनिलाल कुशवाहले यसवर्ष केन्द्रबाट १५ हजार क्विन्टल सोना मन्सुली र ३ हजार क्विन्टल जिरा मसिनो धान खरिद आदेश आएको जानकारी दिनुभयो । यसपटक सोना मन्सुली धानको खरिद मूल्य प्रतिक्विन्टल २ हजार ९ सय २ रुपियाँ संघीय सरकारले नै निर्धारण गरेको र स्थानीय प्राथमिक खरिद समितिले जीरा मसिना धानको खरिद मूल्य २ हजार ९ सय १० रुपियाँ निर्धारण गरेको उहाँले जानकारी दिनुभयो ।
प्रमुख जिल्ला अधिकारी संयोजक रहेको स्थानीय प्राथमिक खरिद समितिमा खाद्य ब्यापार कम्पनी शाखा कार्यालय प्रमुख, कृषि ज्ञान केन्द्र प्रमुख र वीरगञ्ज उद्योग वाणिज्य संघका प्रतिनिधि समेत गरी चार सदस्य रहनुभएको छ ।
