बाबुराम शर्मा
चरिकोट, पुस १७ गते । नयाँ वर्ष लागेसँगै बन्दाबन्दीको कारण लामो समयदेखि बन्द रहेका दोलखाको कालिञ्चोक कुरीका होटल वर्षकै पहिलो पटक भरिभराउ भएपछि होटल व्यवसायीको मुहारमा खुशीयाली छाएको छ ।
नयाँ वर्ष मनाउनका लागि काठमाडौंबाट युवायुवतीहरु र तराई क्षेत्रबाट भारतीयहरु समेत कालिञ्चोक क्षेत्र पुगेकाले कुरीका होटल व्यवसायीको मुहारमा खुशीयाली छाएको हाइल्यान्ड होटलका सञ्चालक यम पाख्रिनले बताउनु भयो ।
उहाँका अनाुसार कुरीमा रहेका सबै होटल एक हप्ता अघिदेखि नै पूर्णरुपमा बुकिङ भएका छन् । यस वर्षकै पहिलो पटक होटलहरु पूर्ण क्षमतामा सञ्चालनमा आएका छन् । नयाँ वर्ष मनाउन युवायुवतीहरु दुई दिनदेखि कालिञ्चोक भरिएका छन् । अझै केही दिन होटलहरु बुकिङमै रहेका छन् ।
नौ महिनादेखि बन्द रहेका मठ मन्दिरहरु एक महिनाअघि खुलेसँगै कालिञ्चोकमा केबुलकार समेत सञ्चालमा आएको छ । अहिले केबुलकार समेत शुक्रबार, शनिबार र बिदाका दिनमा पूर्ण क्षमतामा सञ्चालन हुन थालेको छ ।
गत असोज महिनापछि दोलखामा सबैभन्दा बढी पर्यटक काठमाडौंबाट आउने गरेका छन् । मठमन्दिर बन्द हुँदा पर्खाइमा रहेकाहरु अब धमाधम आउने साङग्रिला होटल सञ्चालक नवराज पाख्रिनले बताउनु भयो ।
विगतका वर्षमा यो सिजनमा पर्यटकहरुको सेवामा भ्याइ नभ्याइ हुन्थ्यो, उहाँले भन्नु भयो, कोरोना भाइरसको महामारीबाट बच्न सरकारले मन्दिर बन्द गरेका थियो । अहिले स्थिति सहज हुँदा मन्दिर खोलेकाले अब पर्यटकहरुको आवागमन पनि पुरानै लयमा फर्कंँदा अर्को हप्ताबाट व्यवसाय पनि पुरानै लयमा फर्कने आशा गरेका छौं । अहिले धार्मिक स्थल खुलेपछि भारतीय पर्यटकहरु समेत आउन थालेका छन् ।
दोलखामा आउने पर्यटकहरु मुख्य गरी भीमेश्वर मन्दिर, कालिञ्चोक र सैलुङमा आउने गरेका छन् । कालिञ्चोक र सैलुङमा यस वर्ष अहिलेसम्म हिउँ परेको छैन । हिउँ परेपछि हिउँ खेल्नकै लागि पनि पर्यटकहरु आउने हुँदा हिउँको पर्खाइमा व्यवसायीहरु रहेका बताइन्छ ।
हिउँ परेपछि कालिञ्चोक र सैलुङ क्षेत्रमा धेरै पर्यटकहरु आउने गर्छन् । राजधानीबाट नजिकको दूरीमा रहेका यस क्षेत्रमा आउने पर्यटकहरु पनि विदेसीभन्दा आन्तरिक नै धेरै हुन्छन् । सिजनमा यस क्षेत्रमा दैनिक १० हजार बढीले भ्रमण गर्छन् । कालिञ्चोकका होटल व्यवसायी चन्द्रकुमार लामाले हिउँ पर्ने सिजनमै धार्मिक स्थल खुलेकाले पर्यटकहरु बढ्ने अर्को आधार रहेको बताउनु भयो ।
२०८१ मंसिर ७ शुक्रवार
