चन्द्र पन्दाक
ताप्लेजुङ, माघ ७ गते । ताप्लेजुङको मेरिङ्देन गाउँपालिकामा ट्याक्टर दुर्घटना हुँदा एक जनाको मृत्यु भएको छ । प्रहरीका अनुसार मेरिङ्देन गाउँपालिका–३ खाम्लुङको साक्फारामा बिहीबार दिउँसो ट्याक्टर दुर्घटना हुँदा एक जनाको मृत्यु भएको हो ।
मिक्वाखोला गाउँपालिकाको साँबादेखि खाम्लुङको दोभानतर्फ जाँदै गरेको मे १ त ७४६१ नम्बरको ट्याक्टर दुर्घटना हुँदा मेरिङ्देन गाउँपालिका–१ थिङ्लाबुका ४५ वर्षीय निमा शेर्पाको मृत्यु भएको हो । जिल्ला प्रहरी कार्यालय ताप्लेजुङका अनुसार दुर्घटनामा परी शेर्पाको घटनास्थलमै मृत्यु भएको हो ।
यस्तै, ट्याक्टरका चालक कृष्ण शेर्पा र सहचालक सञ्जीव लिम्बू घाइते हुनुभएको प्रहरीले जनाएको छ । प्रहरीका अनुसार सहचालक लिम्बू अवस्था गम्भीर भएकाले थप उपचारको लागि जिल्ला बाहिर रेफर गरिएको छ भने चालक शेर्पाको जिल्ला अस्पताल ताप्लेजुङमा उपचार भइरहेको छ । ट्याक्टर अनियन्त्रित भई दुर्घटना भएको पनि प्रहरीले जानकारी दिएको छ ।
