अविनाश चौधरी
धनगढी, माघ १७ गते । कैलाली प्रहरीले सालको कडीसहित एक जना ट्याक्टर चालकलाई पक्राउ गरेको छ ।
अवैध रुपमा काठ ओसारपसार गरिरहेको अवस्थाबाट सुर्खेतको चौकुने गाउँपालिका–१० घाट गाउँका ट्याक्टर चालक २० वर्षीय चक्रबहादुर थापालाई प्रहरीले पक्राउ गरेको हो ।
इलाका प्रहरी कार्यालय सुगरखालबाट खटेको प्रहरी टोलीले कैलालीको मोहन्याल गाउँपालिका–७ बडिगाउँस्थित सोल्टा–चिसापानी सडकमा थापालाई काठसहित नियन्त्रणमा लिएको जिल्ला प्रहरी कार्यालयले जानकारी दिएको छ ।
थापाले भे १ त ६४७९ नम्बरको ट्याक्टरमा अवैध रुपमा सालको कडी ओसारिरहेको पाइएपछि उनलाई पक्राउ गरिएको जिल्ला प्रहरी कार्यालयका प्रवक्ता एवं प्रहरी नायब उपरीक्षक वेदप्रकाश जोशीले जानकारी दिनुभयो । उहाँका अनुसार काठ लिएर चिसापानीतर्फ आइरहेको बेला ट्याक्टर, चालक र काठ नियन्त्रणमा लिइएको हो ।
ट्याक्टरबाट सात फिटका ४५ थान कडी (२६.२५ क्युफिट) बरामद गरिएको छ । बरामद काठ र ट्याक्टरसहित चालकलाई आवश्यक कारबाहीको लागि सब डिभिजन वन कार्यालय चिसापानीलाई बुझाइएको जिल्ला प्रहरी कार्यालयले जानकारी दिएको छ ।
