बेलिना थापा
लमजुङ, माघ २२ गते । पहाडी जिल्ला लमजुङमा हिमपात हुन थालेपछि पर्यटकीय गाउँहरु स्थानीय पर्यटकले भरिभराउ भएको छ । स्थानीय पर्यटक बढेपछि स्थानीय पर्यटनमा टेवा पुगेको स्थानीयको बुझाई छ । उच्च पहाडी क्षेत्रमा बिहीबार रातिदेखि शुक्रबार रातीसम्म बाक्लो हिमपात भएको थियो । हिमपात भएपछि हिउँ खेल्न पर्यटकीय गाउँ जानेको भीड लागेको छ । यसअघि पर्यटकको संख्या शून्यजस्तै रहेको गाउँमा हिमपातपछि सयौं पर्यटक हिमपात भएको क्षेत्रमा पुगेका छन् ।
समुद्री सतहदेखि करिव दुुई हजार एकसय मिटरको उचाईसम्म रहेको क्व्होलासोंथर गाउँपालिका ३ स्थित स्मार्टभिलेज घले गाउँमा पर्यटकको ओइरो लागेको छ । शुक्रबार मात्रै करिब पाँचसय पर्यटक पुगेका छन् । एक सय बढी पर्यटक होमस्टेमा बास बसेका छन् । पर्यटन व्यवस्थापन समिति ग्रामीण पर्यटन घलेगाउँका कार्यालय सचिव दीर्घ घलेकाअनुसार हिमपातपछि पर्यटन व्यवसाय जुर्मुराएको छ ।
‘कोरोना संक्रमण जोखिमका कारण फाट्टफुट्ट मात्र पाहुना आउने गर्थे । दैनिक दश पन्ध्र जना पाहुना आउथें’ उहाँले भन्नुभयो, ‘अहिले हिमपात भएपछि पाहुनाको भिड लागेको छ । कतिपय गाउँ बस्नुभएको छ । कतिपय हिउँ खेलेर फर्कनुभएको छ ।’
घलेगाउँमा हिउँ खेल्न बेंसीसहरलगायतका जिल्लाका विभिन्न स्थानमा नागरिक पुगेका छन् । युवायुवति, कर्मचारी, व्यवसायी घलेगाउँ पुगेका छन् । शनिबार विदा भएकाले धेरै पर्यटक गाउँ पुगेको पर्यटन व्यवस्थापन समिति ग्रामीण पर्यटन घलेगाउँका अध्यक्ष प्रेमबहादुर घलेले बताउनुभयो ।
हिमपातले चिसो बढे पनि पर्यटक आउँदा व्यवसायीलाई फाइदा पुगेको बताउनुभयो । स्थानीयको आयआर्जनमा त्यसले सहज बनाएको उहाँको भनाई छ । घलेगाउँमा करिव दुुई फिट हिउँ जमेको छ । लमजुङको घलेगाउँसँगै घनपोखरा, सिउरुङ, हर्सिङडाँडा, पिसहिल, खाँचेलगायत ठाउँमा हिमपात भएको छ ।
ती क्षेत्रमा हिउँ खेल्नेको भीड लागेको स्थानीयले बताएका छन् । मस्र्याङदी गाउँपालिका १ का अध्यक्ष रुद्रमान गुरुङकाअनुसार हिमपातपछि वडाका पर्यटकीय गाउँमा पर्यटकको ओइरो लागेको छ । घनपोखराका होमस्टे, नायुका होटलहरु भरिभराउ भएको उहाँले बताउनुभयो । ‘बिहीबार रातिदेखि शुक्रबार बेलुकासम्म हिमपात भएको छ । हिमपातपछि गाउँठाउँ सेताम्मे भएको छ । हिउँ खेल्न पाहुना आएका छन्’ उहाँले भन्नुभयो, ‘पर्यटक बढी भएकाले व्यवस्थापनमा समस्या भयो । शनिबार पनि हिउँ खेल्ने पर्यटक आएका छन् ।’
घनपोखराका २३ होमस्टे, नायुका पाँच होटल पर्यटकले भरिएको उहाँले बताउनुभयो । शनिबार पनि पर्यटक आइरहेको उहाँले बताउनुभयो । एक सय बढी पर्यटक घनपोखरा क्षेत्रमा हिउँ खेल्न पुगेका छन् । यसअघि शुन्य पर्यटकीय गाउँठाउँ अहिले पर्यटकले भरिएको स्थानीय सुलबहादुर गुरुङले बताउनुभयो । उहाँकाअनुसार हिमपातपछि पर्यटकीय गतिविधि बढेको छ । पर्यटन व्यवसाय सहज बनाएको छ ।
मस्र्याङदी गाउँपालिका ३ सिउरुङका धनबहादुर गुरुङकाअनुसार हिमपात भएपछि आन्तरिक पर्यटक गाउँ घुम्न आएका छन् । पर्यटक हर्सिङडाँडा र गाउँमा पर्यटक हिउँ खेल्न आएको उहाँले बताउनुभयो । यसअघि एक जना पनि पर्यटक नआएकोमा अहिले पर्यटकलाई स्वागत गर्न पाइएको स्थानीयले बताएका छन् ।
लमजुङका प्रमुख जिल्ला अधिकारी सुशील बैद्यकाअनुसार माथिल्लो भेगमा बाक्लो हिमपात भएको छ । माथिल्लो क्षेत्रमा गाउँ सेताम्मे भएको छ । गाउँमा पर्यटक हिउँ खेल्न पुगेका छन् । यसले जिल्लाको पर्यटन प्रवद्र्धनमा सघाउ पुगेको उहाँले बताउनुभयो ।
