राजु लामिछाने
रुकुम, चैत ५ गते । रुकुम पूर्वको पुथाउत्तरगंगा गाउँपालिका–१२ गर्खानीमा ट्रयाक्टर दुर्घटना हुँदा एकको मृत्यु भएको छ भने दुई जना घाइते भएका छन् ।
पुथाउत्तरगंगा १४ राङ्सीदेखि वडा नम्बर १० तकतर्फ गइरहेको रा १ त ३३७३ नम्बरका ट्रयाक्टर शुक्रवार बेलुकी गर्खानीमा दुर्घटना भएको थियो ।
जिल्ला प्रहरी कार्यालय रुकुम पूर्वका सूचना अधिकारी प्रहरी निरीक्षक मानबहादुर बिसीका अनुसार दुर्घटनामा घाइते भएका तीन जनामध्ये एकको रुकुम पूर्व अस्पतालमा उपचारका लागि ल्याउँदै गर्दा शुक्रबार राति नै बाटोमै मृत्यु भएको छ । उहाँका अनुसार दुर्घटनामा मृत्यु भएकाको अहिलेसम्म पहिचान खुल्न सकेको छैन ।
अन्य दुई जना घाइते रुकुमपूर्व अस्पतालमा सामान्य उपचारपछि थप उपचारका लागि नेपालगञ्ज रेफर गरिएको प्रहरी निरीक्षक बिसीले बताउनुभयो । घाइतेमध्ये एक पुरुषको अवस्था गम्भीर छ ।
गम्भीर घाइतेको पहिचान खुल्न सकेको छैन भने पुथाउत्तरगंगा–१० का वीरप्रताप बुढा मगरको अवस्था खतरामुक्त रहेको छ । ट्रयाक्टर चालक फरार रहेकाले खोजी भइरहेको प्रहरीले जनाएको छ ।
