काठमाडौं, चैत १७ गते । यस वर्षको आरोहणका लागि १४१ जना आरोहीले हिमाल आरोहणका लागि पर्यटन विभागबाट अनुमति लिएका छन् । विभागले जारी गरेको सूचना अनुसार यीमध्ये सगरमाथासहित ११ वटा हिमाल आरोहण गर्न १९ वटा आरोहण दलबाट अनुमति लिएको हो ।
आरोहण अनुमति लिनेमध्ये सबैभन्दा धेरै 'अन्नपूर्ण–एक' हिमालका लागि २५ जना छन् भने दोस्रोमा सगरमाथा र आमादब्लम हिमालका लागि २३/२३ जना छन् । ११ हिमाल आरोहण अनुमति लिनेमा १०९ जना पुरुष र ३३ जना महिला छन् ।
यस वर्ष नयाँ थप हिमालमा थापा पिक आरोहणका लागि चार जना र भेम्दाङ रि हिमाल आरोहणका लागि समेत आठ जना आरोहीले अनुमति लिएको विभागले जनाएको छ ।
आरोहण शुल्क बापत विभागले चार करोड ५१ लाख ९२ हजार ९० रुपियाँ राजस्व सङ्कलन गरेको छ ।
