अपाङ्गता भएका १८२ जनालाई प्रोत्साहन भत्ता

तनहुँको एक नगरपालिकाले ‘ग’ वर्गको पहेंलो कार्ड प्राप्त अपाङ्गता भएका व्यक्तिलाई प्रोत्साहन भत्ता वितरण गरेको छ । नेपाल सरकारले पहेँलो कार्ड प्राप्त व्यक्तिलाई प्रोत्साहन रकम नदिने निर्णय गरे पनि व्यास नगरपालिकाले प्रोत्साहन स्वरुप सो भत्ता दिएको बताएको छ ।

सुख्खा पहिरोमा परी एक जनाको मृत्यु, दुई जना घाइते

बागलुङको बडिगाड गाउँपालिका –७ गोठानमा मोटर बाटो विस्तारको क्रममा खसेको सुख्खा पहिरोमा परी एक जनाको मृत्यु भएको छ । दुई जना घाईते भएका छन् । इदिखोलादेखि गोठान जोड्ने मोटर बाटो खन्दैगरेको अवस्थामा गोठान क्षेत्रमा विस्तार भएको सडक माथिबाट खसेको सुख्खा पहिरोमा परेर स्थानीय ६० बर्षिय गोपिराम विकको मृत्यु भएको हो । मृतक विक सोही मोटरबाटो उपभोक्ता समितिको गत बर्ष अध्यक्षको जिम्मेवारीमा हुनुहुन्थ्यो ।

धरानमा भेटिएको शव दीपक सिग्देलको

कोशी राजमार्गअन्तर्गत धरान–धनकुटा सडक खण्डमा पर्ने धरान– ४ स्थित आँपगाछी क्षेत्रको जङ्गलमा भेटिएको शवको छ दिनपछि पहिचान खुलेको छ । दुई वटा झोलाभित्र टाउको, हात, खुट्टा शरीर छुट्टाछट्टै फेला परेको शव झापाको दमक–नगरपालिका–५ का दीपक सिग्देलको भएको जिल्ला प्रहरी कार्यालयका प्रहरी निरीक्षक सञ्जयसिंह थापाले जानकारी दिनुभयो ।

सुन तस्करीमा दुई विदेशी पक्राउ

नेपाल हुँदै सुन तस्करी गर्न खोज्दा दुई विदेशी नागरिक त्रिभुवन अन्तर्राष्ट्रिय विमानस्थलबाट पक्राउ परेका छन् । दुबईबाट नेपाल हुँदै झण्डै एक किलो सुन तस्करी गर्न लाग्दा भारतीय नागरिक पारसनाथ साह र बङ्गलादेशी नागरिक मोहम्मद उल्लाह पक्राउ परेका विमानस्थल सुरक्षा कार्यालयका प्रमुख प्रहरी वरिष्ठ उपरीक्षक भीमप्रसाद ढकालले जानकारी दिनुभयो । उनीहरुले झण्डै एक किलो सुन तस्करी गर्न खाजेका थिए ।

हिमाली जिल्ला ताप्लेजुङमा मकै खेती लगाउन सुरु

ताप्लेजुङको पूर्वी सिदिङ्वा गाउँपालिकाका किसानले मकै खेती लगाउन (छर्न) सुरु गरेका छन् । मकै बाली गलाउने मौसमको सुरुवातमै यसवर्ष वर्षा भएपछि अहिले किसानले खेती लगाउन सुरु गरेका हुन् ।