गोरखापत्र अनलाइन
काठमाडौं, पुस ५ गते । सहिद स्मारक ए डिभिजन लिगमा संकटा क्लबले आफ्नो पहिलो जित हात पारेको छ । उसले न्युरोड टिमलाई १–० ले पराजित गरेको हो ।
दशरथ रङ्गशालामा शनिबार सम्पन्न खेलमा संकटाले दिपेश आलेमगरको गोलमा पहिलो जित हात पार्न सफल भयो । पहिलो खेलमा न्यु च्यासलसँग पराजित भएको संकटालाई न्युरोड विरुद्ध खेलको सुरुवातमै दिपेशले अग्रता दिलाउनुभयो । दिपेशले खेलको ९ औं मिनेटमा गर्नुभएको गोल नै निर्णायक हुन गयो ।
पहिलो हाफमा १–० को अग्रता कायम राखेको संकटाले दोस्रो हाफको ७५ औं मिनेटसम्म रक्षात्मक खेल खेलेको थियो । दोस्रो हाफको सुरुसम्म पछि रहेको न्युरोडले ६५ देखि ७५ औं मिनेटसम्म आक्रामक खेल्दै गोलका लागि पाएको तीन अवसर सदुपयोग गर्न सकेनन । खेलको उत्तराद्र्धतिर संकटाले ८१ औं मिनेटमा पाएको अवसर सदुपयोग गर्न नसक्दा अग्रता दोब्बर पार्ने अवसर चुक्यो ।
न्युरोड टिमले पहिलो खेलमा सरस्वती युवा क्लबमाथि ४–० को जित हात पारेको थियो । जितसँगै संकटाले तीन अङ्क जोडेको छ ।
२०८१ मंसिर ८ शनिवार
