गोरखापत्र अनलाइन
काठमाडौं, पुस ६ गते । अष्ट्रेलियामा जारी बिग बैश लिग टी ट्वान्टी क्रिकेट प्रतियोगितामा सन्दीप लामिछाने आबद्ध मेलबर्न स्टार्सले ५२ रनको जित हात पारेको छ । मेलबर्नको जितमा सन्दीपले होबर्ट हुरिकैन्सको एक विकेट लिनुभयो ।
मेलबर्नले प्रस्तुत गरेको १६४ रनको लक्ष्य पछ्याउँदै होबर्टले १६ ओभरमा मात्र १११ रनमा समेटिन पुग्यो । लक्ष्य पछ्याउने क्रममा क्रिजमा संयमित पारी खेलेका होबर्टका कालेब जेवेलको विकेट सन्दीपले हात पारे । कालेब जेवेल मात्र २१ बल खेलेर २५ रन बनाउँदा सन्दीपको बलमा ब्याटको छेउ लागेर हिन्चक्लिफको हातमा क्याच थमाउन पुगे । क्लिब रोजले अविजित ३२ रन बनाएपनि होबर्टलाई जिताउन सक्नुभएन ।
सन्दीपले तीन ओभरमा १८ रन खर्चेर एक विकेट लिनुभयो । पहिलो तीन ओभरमा मात्र पाँच रन खर्चिनुभएको थियो । सन्दीपले आफ्नो अन्तिम ओभरमा महँगो साबित हुँदै १३ रन खर्चिन पुगे ।
२०८१ मंसिर ८ शनिवार
