गोरखापत्र अनलाइन
काठमाडौं, पुस १५ गते । सहिद स्मारक ए डिभिजन लिगमा जावलाखेल युवा क्लबले न्यु च्यासल युवा क्लबलाई २–० ले हराएको छ । खेलको पहिलो हाफ गोलरहित बराबरीमा सम्पन्न भएको खेलको दोस्रो हाफको अन्त्यतिर जावलाखेलले दुई गोल गर्दै महत्वपूर्ण तीन अङ्क जोडेको छ ।
सातदोबाटोस्थित एन्फा कम्प्लेक्समा सम्पन्न खेलको ८० औं मिनेटमा विजय घलानको पासमा रुपबहादुर लामाले गोल गर्नुहुँदै जावलाखेललाई १–० को अग्रता दिलाउनुभयो । अग्रता लिएको मिनेट नबित्दै घलानले आफ्नै प्रहारलाई गोलमा परिणत गर्नुहुँदै जावलाखेलको अग्रतालाई दोब्बर पार्नुभयो ।
खेलको पहिलो र दोस्रो हाफमा च्यासलले पटक पटक पाएको अवसर सदुपयोग गर्न सकेनन । च्यासलका लागि ३४ औं मिनेटमा सुनिल बलको फ्रिकिकमा छिरिङ्ग गुरुङले पाएको अवसर हेडर आफैंले डिफेन्स गरिदिदा अग्रता लिनबाट चुक्यो । त्यसअघि खेलको ९ औं मिनेटमा नीरबहादुर आलेको प्रहार पोष्टबाट बाहिरिदा जावलाखेलले खेलमा अग्रता लिने मौका गुमायो ।
जावलाखेलले लिगको चार खेलमध्ये दुईमा जित र दुईमा बराबरी खेलेर आठ अङ्क जोडेको छ । च्यासलले चार खेलमध्ये एकमा जित, एक बराबरी र दुईमा हार बेहोरेर चार अङ्क जोडेको छ ।
२०८१ मंसिर ८ शनिवार
