गोरखापत्र अनलाइन
काठमाडौं, पुस २६ गते । सहिद स्मारक ए डिभिजन लिगमा मच्छिन्द्र क्लबले चौथो जित हात पारेको छ । जितसँगै मच्छिन्द्र क्लब अङ्क तालिकाको शिर्ष स्थानमा उक्लिएको छ ।
दशरथ रङ्गशालामा शनिबार सम्पन्न पहिलो खेलमा मच्छिन्द्रले जावलाखेल युथ क्लबमाथि १–० को जित हात पारेको हो । मच्छिन्द्रका लागि विशाल राईले गर्नुभएको एक मात्र गोल निर्णायक रहयो । ३९ औं मिनेटमा विशाल राईले मच्छिन्द्रका लागि निर्णायक गोल गर्नुभयो । लगत्तै रेजिन सुब्बाले पाउनुभएको अवसर सदुपयोग गर्न नसक्दा उसले अग्रता दोब्बर पार्नबाट बञ्चित भयो । ४२ औं मिनेटमा रेजिनले गर्नुभएको प्रहार गोलपोष्ट पुगेपनि रेफ्रीले अफसाइड दिएपछि मच्छिन्द्र १–० मै चित्त बुझायो ।
जितसँगै मच्छिन्द्रले छ खेलबाट १३ अङ्क आर्जन गर्दै तालिकाको शिर्ष स्थानमा पुगेको हो । जावलाखेलले छ खेलबाट ९ अङ्क प्राप्त गरेको छ । जारी लिगमा जावलाखेलको यो पहिलो हार हो ।
शनिबारका लागि नै निर्धारित अर्को खेलमा मनाङ् मस्र्याङ्दी क्लबले हिमालयन शेर्पालाई हराए मच्छिन्द्रले शिर्ष स्थान गुमाउनेछ । खेल बराबरीमा सम्पन्न भए वा मनाङले हार बेहोरे मच्छिन्द्र शिर्ष स्थानमा रहीरहनेछ ।
२०८१ मंसिर ८ शनिवार
