गोरखापत्र अनलाइन
काठमाडौं, पुस २६ गते । सहिद स्मारक ए डिभिजन लिगको छैठौं चरणको दोस्रो खेलमा मनाङ मस्र्याङ्दी क्लबलाई हिमालयन शेर्पा क्लबले गोलरहीत बराबरीमा रोकेको छ । बराबरीसँगै हिमालयनमाथि जित हात पारेर अङ्कतालिकाको शिर्ष स्थानमा पुनः उक्लिने अवसर समेत मनाङले गुमाएको छ ।
बराबरी खेलेर अङ्क बाँडेको मनाङले त्रिभुवन आर्मी क्लबलाई हेड टु हेडमा पछि पार्दै अङ्कतालिकाको दोस्रो स्थान प्राप्त गर्न भने सफल भयो । जावलाखेलमाथि जित हात पारेर मच्छिन्द्र क्लब १३ अङ्कसहित तालिकाको शिर्ष स्थानमा उक्लिएको छ ।
एन्फाले मच्छिन्द्र र मनाङका तीन तीन खेलाडीमा कारबाही गरेपछि मनाङले बेञ्चका तीन खेलाडी लिएर हिमालयन विरुद्ध दशरथ रङ्गशालामा उत्रिएको थियो । पहिलो रोजाइका खेलाडी पाँच खेलका लागि निलम्बनमा परेपछिको प्रभाव हिमालयन विरुद्धको खेलमा मनाङले प्रत्यक्ष महसुस गर्यो ।
खेलको पहिलो हाफमा गोल गर्ने अवसर पाएपनि मनाङ्ले सदुपयोग गर्न सकेनन । हिमालयन शेर्पाले पनि पहिलो र दोस्रो हाफमा पाएको अवसरहरु सदुपयोग गर्न सकेनन ।
२०८१ मंसिर ८ शनिवार
