पुलिसमाथि न्यूरोड टिमको जित

गोरखापत्र अनलाइन
काठमाडौं, पुस २८ गते । सहिद स्मार ए डिभिजन लिगमा न्यू रोड टिमले नेपाल पुलिस क्लबलाई हराएको छ । जारी लिगमा न्यू रोडको यो तेस्रो जित हो ।
दशरथ रङ्गशालामा सोमबार सम्पन्न पहिलो खेलमा न्यूरोडले पुलिसमाथि १–० को जित हात पार्यो । न्यूरोड टिमका लागि दर्शन गुरुङले गर्नुभएको गोल निर्णायक रह्यो । उहाँले ७६ औं मिनेटमा गोल गर्नुहुँदै खेलमा न्यूरोडलाई १–० को अग्रता दिलाउनुभयो । राजेश परियारको पासमा दर्शनले पेनाल्टी बक्सको मध्यबाट गर्नुभएको प्रहार गोलमा परिणत भयो । जितसँगै न्यूरोड टिमले तीन अङ्क जोडेको छ ।
गत् सिजनमा लिगको पूछारमा रहँदा न्यूरोड टिमले दुई अङ्क गुमाएको छ । जारी लिगको तीन खेलमा जित र दुईमा हार तथा एकमा बराबरी खेलेको न्यूरोडले १० अङ्क प्राप्त गरेपनि उसको आठ अङ्क कायम भएको छ । पुलिसको पनि सामान ८ अङ्क छ । पुलिसमाथि जितसँगै न्यूरोड छैठौं स्थानमा उक्लिएको छ भने पुलिस सातौं स्थानमा झरेको छ ।