एजेन्सी
काठमाडौं, माघ ६ गते । मोइजेज हेनरिक्सले विष्फोटक पारी खेलेपछि सिड्नी सिक्सरले अष्ट्रेलियामा जारी बिग बैश लिगमा मेलबर्न स्टार्सलाई २१ रनले हराएको छ । मेलबर्नले लिग चरणमा आफ्नो दुई खेल बाँकी छदै क्वालिफायरको लागि स्थान सुनिश्चित गरिसकेको छ । उसले १२ खेलमध्ये १० मा जित हात पार्दै अङ्कतालिकाको शिर्ष स्थानमा रहेको छ ।
वर्षाले १४ ओभरमा सीमित भएको खेलमा मेलबर्नले १४७ रनको लक्ष्य पाएको थियो । उसले १४ ओभरमा पाँच विकेटको क्षतिमा मात्र १२५ रन जोडन सक्यो । ओपनर मार्कस स्टोनिसले मात्र ३७ बलमा ६२ रन बनाएपनि मेलबर्नलाई जितको लागि अपर्याप्त भयो । कप्तान ग्लैन म्याक्सवैल १३ बलमा १२ रन तथा हिल्टन कार्टराइटले २१ रनको योगदान दिनुभयो । मेलबर्नलाई १२५ रनमा रोक्न डेथ ओभरमा सिड्नीका बेन ड्वारसस र टम कर्रनले सामान दुई दुई विकेट लिनुभयो ।
यसअघि टस हारेर पहिला ब्याटिङ्ग गर्ने निम्ता पाएको घरेलु टोली सिड्नीले २६ रनमै दुई विकेट गुमाएर कमजोर सुरुवात गरेको थियो । तर कप्तान मोइजेज हेनरिक्सले उक्त क्षतिलाई निस्तेज गर्नुहुँदै विष्फोटक पारी खेल्नुभयो । उहाँले दुई चौका र आठ छक्काको सहयोगमा ७२ रन बनाउनुभयो । जेम्स भिन्सले २२ बलमा ४१ रन बनाएर अविजित रहनुभयो । मेलबर्नका लागि सन्दीप लामिछानेले दुई तथा डेनियल वरेलले एक विकेट लिनुभयो । सन्दीप महँगो साबित भएपनि पाँचौ ओभरको चौथो र छैठौ बलमा दुई विकेट लिएर सिड्नीका दुबैजना ओपनर ब्याट्सम्यानलाई पेभेलियन फर्काएर उत्कृष्ट सुरुवात दिलाउनुभयो ।
२०८१ मंसिर ८ शनिवार
