एजेन्सी
काठमाडौं, फागुन १३ गते । प्रिमियर लिगमा लिभरपुलले संघर्षपूर्ण जित निकाल्दै आफ्नो अपराजित यात्रालाई कायम राखेको छ । उसले वेष्टहममाथि ३–२ को कठीन जित हात पारेको हो ।
जितसँगै लिभरपुलले प्रिमियर लिगमा लगातार १८ खेलमा जित हात पार्ने म्यान्चेष्टर सिटिको कीर्तिमानको बराबरी गरेको छ । सिटिले अगष्ट २०१७ देखि डिसेम्बरसम्म लगातार प्रिमियर लिगको खेल जितेर उक्त कीर्तिमान बनाएको थियो ।
खेलको ९ औं मिनेटमा गोल गर्दै अग्रता लिएको लिभरपुलले दोस्रो हाफको सुरुवातमै पछि परेको थियो । जर्जिन्हो विजनाल्डमले ट्रेन्ट अलेक्सजेण्डर अर्नोल्डको पासमा गोल गर्नुहुँदै लिभरपुललाई १–० को अग्रता दिलाउनुभयो । तीन मिनेटपछि वेष्टहमका लागि रोवर्ट स्रोडग्रासको पासमा इसा डियोपले गोल गर्नुहुँदै खेल १–१ को बराबरीमा ल्याउनुभयो ।
५४ औं मिनेटमा वेष्टहमले लिभरपुलमाथि २–१ को महत्वपूर्ण अग्रता कायम गर्यो । पाब्लो फोर्नाल्सले डेक्लान राइसको पासलाई गोलमा परिणत गर्दा लिभरपुलमाथि दबाब बढेको थियो । ६८ औं मिनेटमा मोहम्मद सलहले गोल गर्नुहुँदै वेष्टहमको अग्रतालाई बरारबीमा परिणत गर्नुभयो । ८१ औं मिनेटमा साडियो मानेले गर्नुभएको गोल लिभरपुलको अपराजित यात्रालाई कायम राख्न महत्वपूर्ण मात्रै साबित भएनन, उसले वेष्टहममाथि कठीन जित समेत दिलायो ।
जितसँगै लिभरपुलले २७ खेलबाट ७९ अङ्क बटुल्दै दोस्रो स्थानमा म्यान्चेष्टर सिटिबाट २२ अङ्कको स्पष्ट अग्रता समेत कायम गरेको छ । जितले उपाधि हात पार्ने उसको सम्भावनालाई थप मजबूत बनाएको छ । उसले २७ खेलमध्ये २६ मा जित र एक बराबरीमा टुंग्याएको छ ।
वेष्टहम भने २७ खेलबाट मात्र २४ अङ्क बटुलेको छ । ऊ १८ औं स्थानमा छ ।
२०८१ मंसिर ८ शनिवार
