गोरखापत्र अनलाइन
काठमाडौं, फागुन १३ गते । डिफेन्डिङ् च्याम्पियन ललितपुर पेट्रिओट्सले एभरेष्ट प्रिमियर लिगका लागि तीन जना पाकिस्तानी खेलाडीलाई अनुबन्धन गरेको छ । ललितपुरले पाकिस्तानका अलराउण्डर हम्माद आजम र हस्सन खान तथा देब्रे हाते तिब्र गतिका बलर मीर हाम्जालाई अनुबन्धन गरेको हो ।
ललितपुर पेट्रिओट्सले आफ्नो आधिकारिक फेसबुक पेजमा उहाँहरुको अनुबन्धनबारे जानकारी गराएको हो । यसअघि ललितपुरले श्रीलङ्का क्रिकेट टोलीका ब्याट्सम्यान उपुल थरङ्गालाई टोलीमा अनुबन्धन गरेको थियो । प्रिमियर लिगमा तीन जना विदेशी खेलाडी राख्नुपर्ने प्रावधान बमोजिक उसले हालसम्म चारजना विदेशी खेलाडीलाई अनुबन्धन गरेको छ ।
हम्मादले पाकिस्तानको लागि ११ अन्तर्राष्ट्रिय एकदिवसीय र पाँच टी ट्वान्टी अन्तर्राष्ट्रिय खेल्नुभएको छ । जसमा उहाँले सात म्याचमा ब्याटिङ गर्ने अवसर पाउँदा ८० रन जोड्नुभएको छ । पाँच टी ट्वान्टीमा उहाँले मात्र ३४ रन बनाउनुभएको छ । बलिङमा उहाँले दुई विकेट लिनुभएको छ ।
तिब्र गतिका बलर मीर हाम्जाले भने पाकिस्तानको प्रतिनिधित्व गरी अहिलेसम्म एक मात्र टेष्ट म्याच खेल्नुभएको छ । सन् २०१८ मा अष्ट्रेलिया विरुद्ध आफ्नो अन्तर्राष्ट्रिय क्रिकेट करियरको सुरुवात गर्नुभएको उहाँले उक्त टेष्ट खेलमा हाम्जाले दुबै पारीमा एक मात्र विकेट लिएपनि पाकिस्तानले ३७३ रनले जितेको थियो ।
२०८१ मंसिर ८ शनिवार
