एजेन्सी
काठमाडौं, फागुन २२ गते । मशरफे मर्तजा जिम्बाबवे विरुद्धको तेस्रो अन्तर्राष्ट्रिय एकदिवसीय खेल कप्तानको रुपमा आफ्नो अन्तिम खेल हुने बताउनुभएको छ । बङ्गलादेश क्रिकेट बोर्डका अध्यक्ष नजमुल हसनले जिम्बाबवे विरुद्धको श्रृखंलापछि नयाँ कप्तान नियुक्त गर्ने बताएको भोलीपल्टै मर्तजाले आफू कप्तानबाट राजिनामा गर्ने बताउनुभएको हो । यद्दपी आफू खेलाडीको रुपमा रहीरहने उहाँले प्रष्ट्याउनुभएको छ ।
मर्तजाले बङ्गलादेशलाई च्याम्पियन्स ट्रफी २०१७ को सेमीफाइनलसम्म र विश्वकप क्रिकेट २०१५ को क्वार्टरफाइनलसम्म पुर्याउनुभएको थियो । २०१४ को नोभेम्बरमा उहाँलाई अन्तर्राष्ट्रिय एकदिवसीय क्रिकेटको कप्तान नियुक्त गरिएको थियो । उहाँ तेस्रोपटक टोलीको कप्तान नियुक्त हुनुभएको थियो । त्यसअघि उहाँ २००९ मा पहिलोपटक बङ्गलादेशको नेतृत्व गर्ने जिम्मेवारी पाउनुभएको थियो ।
मर्तजाले ८७ अन्तर्राष्ट्रिय एकदिवसीयमा बङ्गलादेशको नेतृत्व गर्नुभएको छ । जसमध्ये ४९ मा हार र ३६ मा जित हात पारेको छ । उहाँकै नेतृत्वमा बङ्गलादेशले २८ टी ट्वान्टीमध्ये दशमा जितेको छ ।
वेष्टइन्डिज विरुद्ध सन् २००९ मा किंग्स्टनमा मर्तजाले एक मात्र टेष्टको नेतृत्व गर्ने अवसर पाउनुभयो । जुन बङ्गलादेशले जितेको थियो ।
