गोरखापत्र अनलाइन
काठमाडौं, मंसिर १८ गते । न्युजिल्याण्ड भ्रमणमा रहेको पाकिस्तान क्रिकेट टोलीका थप एक सदस्यमा कोभिड–१९ सङ्क्रमणको पुष्टि भएको छ । न्युजिल्याण्डमा रहेको पाकिस्तान क्रिकेट टोलीका आठौं सदस्यमा सङ्क्रमणको पुष्टि भएको हो ।
न्युजिल्याण्डको स्वास्थ्य मन्त्रालयले मंगलबारदेखि अनुसन्धान गरिरहेको तीन सदस्यमध्ये एकजनामा बुधबार सङ्क्रमणको पहिचान गरिएको हो । सङ्क्रमण पुष्टि भइरहेसम्म पाकिस्तान क्रिकेट टोलीलाई अभ्यासको अनुमति नदिइने न्युजिल्याण्डको स्वास्थ्य मन्त्रालयले जनाएको छ । क्यान्टरब्यूरीका स्वास्थ्य अधिकृतले अभ्यासमा सहभागी भए कोरोना सङ्क्रमण फैल्ने सम्भावना नरहने नबताएसम्म पाकिस्तान क्रिकेट टोलीका सदस्यहरु अभ्यासमा सहभागी हुन पाउने छैनन् ।
क्राइस्टचर्चमा ब्यवस्थित क्वारेन्टिनमा रहेको पाकिस्तान क्रिकेट टोलीका सदस्यहरुले चार चरणको परीक्षण पार गरेपछि मात्रै स्वतन्त्र रुपले अभ्यास गर्न पाउने र हिंडडुल गर्न पाउनेछन् ।
२०८१ मंसिर ९ आईतवार
