हरिप्रसाद कोइराला
पथरीशनिश्चरे–मोरङ, मङ्सिर २९ गते । मोरङको पथरीम जारी पथरीशनिश्चरे प्रिमियर लिग फुटबल प्रतियोगिता अन्तर्गत आइतबार सम्पन्न खेलमा वाइ.जी.एफ.टी र द रियल ब्रदर्सले १–१ गोलको बराबरी खेल्दै अङ्क बाँडेका छन् । द रियल ब्रदर्सका सुजन खत्रीले खेलको ११ओैं मिनेटमा गोल गर्दै टिमलाई १–० को अग्रता दिलाउनु भएको थियो ।
अत्यन्तै प्रतिस्पर्धात्मक खेलमा द रियल ब्रदर्स अन्तिम ४ मिनेट सम्हालिएर खेल्न नसक्दा अङ्क बाँड्न बाध्य भएको हो । निर्धारित ८० मिनेट पछि थपिएको अतिरिक्त समयको पहिलो मिनेटमै वाइजीएफटिका नमन लिम्बूले पेनाल्टी मार्फत गोल गरेपछि दि रियल ब्रदर्सलाई बराबरीमा रोक्यो । लिम्बूको गोलले खेलमा फर्किएको वाइजिएफटीले अतिरिक्त समय भित्रै लगातार एकपछि अर्को आक्रामक प्रहार गरेपनि द रियल ब्रदर्सका सबै खेलाडी रक्षापक्तिमा झरेपछि टिमलाई हारबाट जोगाएका थिए ।
प्रस्तावित पथरी रंगशालामा भइरहेको प्रथम प्रिमियर लिगको आइतबारको खेलको म्यान अफदी म्याच वाइजीएफटीका सञ्जय लिम्बू घोषित हुनुभयो । सोमबार हाइवे क्लव र न्यू स्टार क्लब बीच खेल हुनेछ ।
२०८१ मंसिर ९ आईतवार
