गोरखापत्र अनलाइन
काठमाडौं, पुस ९ गते । रियल मड्रिडले ग्रनाडामाथि जित हात पार्दै स्पेनिस ला लिगामा शिर्ष स्थानको एटलेटिको मड्रिडसँग अङ्क बराबरी गरेको छ । रियल मड्रिडले ग्रनाडामाथि २–० को जित हात पार्यो ।
रियलको जितमा सेसिमिरो र करिम बेञ्जिमाले सामान एक एक गोल गर्नुभयो । पहिलो हाफमा कमजोर प्रदर्शन गरेको रियलले दोस्रो हाफको सुरुवातमै अग्रता बनाउन सफल भयो । मार्को असेन्सियोले देब्रे तर्फबाट गर्नुभएको क्रसलाई सेसिमारोले हेडरमार्फत् गोलको दिशा दिदै १–० को अग्रता दिलाउनुभयो । सेसिमारोले रियलका लागि जारी सिजनमा चौथो गोल गर्नुभयो । यो छ खेलमा सेसिमारोको तेस्रो गोल हो ।
दोस्रो हाफको इन्जयुरी समयमा करिम बेञ्जिमाले २० यार्डबाहिरबाट गर्नुभएको प्रहार गोलमा परिणत हुँदा रियलले ग्रनाडामाथि २–० को जित सुनिश्चित गर्यो ।
पहिलो हाफमा ब्राजिलि विंगर १९ वर्षीय रोड्रिगो घाइते भएर बाहिरिएपछि रियल दबाबमा आएको थियो । रियलको यो लगातार छैठौं जित हो । ला लिगामा रियलको यो पाँचौं जित हो । रियलले एटलेटिकोसँग सामान ३२ अङ्क बटुल्दै बराबरी गरेको छ । तर उसले एटलेटिकोभन्दा दुई बढी १५ खेल खेलेको छ ।
