गोरखापत्र अनलाइन
काठमाडौं, माघ ८ गते । नेपाल पुलिस क्लबका अलराउण्डर पवन सर्राफले १३ बलमै अद्र्धशतक लगाउनुभएको छ । प्रधानमन्त्री कप राष्ट्रिय पुरुष क्रिकेट प्रतियोगितामा यो सबैभन्दा तेज अद्र्धशतक हो ।
लुम्बिनि प्रदेश विरुद्धको खेलमा उहाँले अविजित रहँदै ५० रनको अद्र्धशतकीय पारी खेल्नुभयो । ४८ औं ओभरमा दिपेन्द्र सिंह ऐरी पेभेलियन फर्केपछि ब्याटिंग गर्न आउनुभएका पवनले अन्तिम १६ बलमध्ये १३ बलको सामना गर्नुभयो । उहाँले आफ्नो अद्र्धशतकीय पारीमा एक चौका र छ छक्का लगाउनुभयो । जसमा अन्तिम ओभरको चार बलमा उहाँले चार छक्का लगाउनुभयो । ४८ औं ओभरको दोस्रो बलमा ऐरीको रुपमा चौथो विकेट झर्दा २५४ रनको योगफल तयार गरेको नेपाल पुलिसले सर्राफको विष्फोटक ब्याटिंगमा ५० ओभरमा चार विकेटको क्षतिमा ३१० रनको विशाल योगफल तयार गर्न सफल भयो ।
