गोरखापत्र अनलाइन
काठमाडौं, माघ २६ गते । बेञ्चबाट बोलाइएको तीन मिनेट नबित्दै लियोनल मेस्सीले गोल गरेपछि बार्सिलोनाले रियल बेटिसलाई हराएको छ । बार्सिलोनाले रियल बेटिसलाई २ –३ ले हराएको हो ।
घरेलु टोली रियल बेटिसले पहिलो हाफमै अग्रता लिएर बार्सिलोनामाथि दबाब बनाउन सफल भयो । ३८ औं मिनेटमा बोर्जा इग्लेसियासले गोल गर्दै बेटिसलाई महत्वपूर्ण अग्रता दिलाउनुभयो । बेञ्चमा बसाइएका लियोनल मेस्सीलाई प्रशिक्षक रोनाल्ड कोइमनले ५७ औं मिनेटमा ग्राउन्डमा उतार्नुभयो । दुई मिनेटपछि बार्सिलोनाका लागि मेस्सीले गोल गर्दै खेल १–१ को बराबरीमा ल्याउनुभयो । भिक्टर रुइजले आफ्नै पोष्टमा गोल गरेपछि बार्सिलोनाले अग्रता लिन सफल भयो । रुइजले दुई मिनेटपछि गलती सुधार गर्दै बेटिसका लागि गोल गर्दै खेल २–२ को बराबरीमा ल्याउनुभयो । तर मचाडो ट्रिनकाओले ८७ औं मिनेटमा गोल गर्दा बार्सिलोनाको रियल बेटिसमाथि २–३ को जित दिलाउन पर्याप्त हुन गयो ।
जितसँगै बार्सिलोना स्पेनिस ला लिगा अङ्कतालिकाको दोस्रो स्थानमा उक्लेको छ । शीर्षस्थानको एटलेटिको मड्रिडले १९ खेलबाट ५० अङ्क बटुलेको हो । बार्सिलोनाले भने २१ खेलबाट ४३ तथा रियल मड्रिडले २१ खेलबाट ४३ अङ्क बटुलेको हो ।
२०८१ मंसिर १० सोमवार
