गोरखापत्र अनलाइन
काठमाडौं, माघ २९ गते । एटलान्टाले कोपा इटालियाको फाइनलमा युभेन्ट्ससँगको भेट तय गरेको छ । दोस्रो सेमिफाइनल खेलमा एटलान्टाले नपोलीमाथि जित हात पार्दै फाइनलमा युभेन्ट्स विरुद्धको भेट सुनिश्चित गरेको हो ।
गए राति सम्पन्न कोपा इटालियाको दोस्रो सेमिफाइनल खेलमा एटलान्टाले नपोलीमाथि ३–१ को जित हात पार्यो । पहिलो लिग गोलविहीन खेलेको एटलान्टाका लागि डुभान जपाटाले २५ गजबाहिरबाट गर्नुभएको प्रहार गोलमा परिणत हुँदा ऊ खेल सुरु भएको १० औं मिनेटमै १–० को अग्रता लिन सफल भयो । जपाटाले एटलान्टाले गरेको बाँकी दुई गोलमा समेत महत्वपूर्ण भूमिका निर्वाह गर्नुभयो । उहाँले माटेओ पेस्सीनाका लागि गोल गर्ने अबसर तयार गर्नुभयो । पेस्सीनाले १६ औं मिनेटमा एटलान्टाका लागि गोल गर्दै खेल २–० मा पुर्याउनुभयो ।
पहिलो हाफमा गोल फर्काउन नसकेको नपोलीले दोस्रो हाफको ५३ औं मिनेटमा हर्भिङ लोजानोको गोल आशा बनेर आयो । तर ७६ औं मिनेटमा पेस्सीनाले थपेको गोल एटलान्टालाई नपोलीमाथि ३–१ को जित मात्र दिलाएनन बरु युभेन्ट्ससँग फाइनलको स्पर्धा तय गरायो ।
कोपा इटालियाको फाइनल खेल मई १९ मा खेलाइनेछ ।
२०८१ मंसिर १० सोमवार
