गोरखापत्र अनलाइन
काठमाडौं, माघ ३० गते । इंग्ल्याण्डका तीब्र गतिका बलर जोफ्रा आर्चर भारत विरुद्धको दोस्रो टेष्टबाट बाहिरिनुभएको छ । दाहिने कुहिनामा सुई लगाएपछि शनिबारबाट सुरु हुने दोस्रो टेष्ट खेलबाट उहाँ बाहिरिनुहुने भएको हो ।
इंग्ल्याण्डले पहिलो टेष्ट खेलमा भारतलाई हराउँदा जोफ्रा आर्चरले पहिलो पारीमा भारतका दुबै जना ओपनर ब्याट्सम्यानलाई पेभेलियन फर्काएर तीन विकेट लिनुभएको थियो । बिहीबार अभ्यासको क्रममा उहाँले दाहिने कुहिनामा पीडा भएको जनाएपछि उहाँलाई पीडा कम गर्ने सुई लगाइएको थियो । इंग्ल्याण्ड शिविरले भने जोफ्राको समस्या सामान्य रहेको र तेस्रो टेष्टमा पुनरागमन गर्ने विश्वास लिएको छ । तेस्रो टेष्ट खेल फेब्रुअरी २४ मा अहमदाबादमा सुरु हुनेछ ।
करिब एक वर्ष अघि जोफ्रा आर्चरको दाहिने कुहिना नै भाँचिएको थियो । तर इंग्ल्याण्ड शिविरले उक्त समस्यासँग हाल देखिएको पीडाको कुनै सम्बन्ध नरहेको प्रष्ट्याएको छ ।
२०८१ मंसिर १० सोमवार
