एटलेटिको मड्रिडको जित

गोरखापत्र अनलाइन
काठमाडौं, फाल्गुन २ गते । एटलेटिको मड्रिडले ग्रनाडामाथि २–१ को जित हात पारेको छ । जितसँगै एटलेटिकोले स्पेनिस ला लिगामा आफ्नो वर्चश्वलाई यथावत् राखेको छ । जारी सिजनमा ऊ एक खेलमा मात्रै हार बेहोरेको छ । अङ्कतालिकाको दोस्रो स्थानमा रहेको बार्सिलोनाभन्दा ऊ आठ अङ्कको अग्रता बनाएको छ । बार्सिलोनाभन्दा एक खेल कम खेलेको एटलेटिकोले २१ खेलबाट ५४ अङ्क बटुलेको छ ।
पहिलो हाफसम्म गोलरहित बराबरीमा टुंगिदा लुइस सौरेजले दोस्रो हाफको सुरुवातमै गोल गर्ने उत्कृष्ट अवसर पाउनुभयो । तर गोलमा परिणत हुनसकेन । ६३ औं मिनेटमा मार्कस लौरेन्टोले २० गज बाहिरबाट गर्नुभएको प्रहार गोलको दिशा लिएपछि एटलेटिकोले खेलमा १–० को अग्रता बनायो । तर एटलेटिकोले कर्नरलाई क्लियर गर्न नसक्दा ग्रनाडाले ६६ औं मिनेटमा याञ्जेल हेरेराको गोलमा खेल १–१ को बराबरीमा ल्याउन सफल भयो ।
एञ्जेल कोरेयाले ७५ औं मिनेटमा गोल गर्दा एटलेटिकोले ग्रनाडामाथि २–१ को जित हात पार्न सफल भयो ।