सी डिभिजन लिगको खेल तालिका सार्वजनिक

गोरखापत्र अनलाइन
काठमाडौं, फाल्गुन ७ गते । अखिल नेपाल फुटबल संघ(एन्फा)ले सी डिभिजन फुटबल लिगको खेल तालिका सार्वजनिक गरेको छ । तालिका बमोजिम चैत्त १ गते पहिलो खेल खेलाइनेछ ।
एन्फाको बिहीबार बसेको बैठकले सी डिभिजन लिग चैत्त एक गतेदेखि सुरु गर्ने निर्णय गर्दै खेल तालिका सार्बजनिक गरेको हो । लिगमा कुल १४ टोली सहभागी हुनेछन् । १४ टोलीलाई सात सात वटा गरेर दुई समूहमा विभाजन गरिएको छ । दुबै समूहका शीर्ष तीन टोली सुपर सिक्सका लागि योग्य हुनेछन् । सुपर सिक्समा प्रत्येक टोलीले अर्को समूहका तीन टोलीसँग तीन तीन म्याच खेल्नेछन् । छ टोलीमध्ये शीर्ष तीन टोली बी डिभिजन लिगका लागि बढुवा हुनेछन् ।
त्यसैगरी, दुबै समूहका पूछारमा रहने दुई दुई टोलीले प्ले अफ खेल्नेछ । र हार्ने टोली सी डिभिजनको छनोट खेलका लागि रेलिगेट हुनेछन् ।
लिग चरणमा जम्मा ४२ खेल हुनेछन् । लिग चरणको अन्तिम खेल चैत्त २४ गते एन्फा कम्प्लेक्स सातदोबाटोमा खेलाइनेछ ।
एन्फाले विभाजन गरेको तालिका बमोजिम समूह ए मा वीरगञ्ज युथ एकेड्मी, खलिबारी यूथ एफ सी, मनोहरा यूनाइटेड क्लब, सानो गौचरण युथ क्लब, समाज कल्याण खेलकुद केन्द्र, महाबीर क्लब र झापा एफ सी छन् ।
त्यसैगरी, समूह बी मा प्लानिंग बोइज यूनाइटेड, ओआसिस क्लब, सानेपा क्लब, सामाजिक युवा क्लब, स्वयम्भु क्लब, वीरगञ्ज यूनाइटेड क्लब र चर्च बोइज यूनाइटेड छन् ।