गोरखापत्र अनलाइन
काठमाडौं, फागुन १६ गते । हेल्लास भरोनाले युभेन्ट्सलाई बराबरीमा रोकेको छ । इटाली सिरी ए अन्तर्गत गए राति सम्पन्न खेलमा हेल्लास भरोनाले युभेन्ट्सलाई १–१ को बराबरीमा रोकेको हो ।
पहिलो हाफ गोलरहित बराबरीमा सम्पन्न भएको खेलको दोस्रो हाफको सुरुवातमै क्रिष्टियानो रोनाल्डोले गोल गर्दै युभेन्ट्सलाई १–० को अग्रता दिलाउनुभयो । उहाँले फेडेरिको सिसाको पासलाई गोलमा परिणत गर्नुभयो । जारी सिजनमा रोनाल्डोले आफ्नो १९ औं गोल पूरा गर्नुभयो ।
एन्टोनिन बराकले डार्को लाजोभिकको क्रसलाई हेडरमार्फत् गोल गर्दै हेल्लास भरोनाका लागि बराबरी गोल फर्काउनुभयो । बराकले ७७ औं मिनेटमा गोल गर्नुभयो । युभेन्ट्स बराबरीमा रोकिएसँगै दोस्रो स्थानको एसी मिलानसँग अङ्कतालिकामा बराबरी गर्ने अवसरबाट चुक्यो । युभेन्ट्स शीर्ष स्थानको इन्टर मिलानभन्दा सात अङ्कले पछाडि छ । इन्टर मिलानको ५३ अङ्क छ । एसी मिलानको ४९ अङ्क छ ।
आइतबार हुने इन्टर मिलान र जिनोआको खेलमा मिलानले जित हात पारे ऊ युभेन्ट्सभन्दा दश अङ्कको स्पष्ट अग्रता लिनेछ ।
२०८१ मंसिर १० सोमवार
