कृष्णराज खनाल
टोकियो ओलम्पिक नजिकिँदै जाँदा अमेरिकाका एकजना फुच्चे धावकले चमत्कारिक प्रदर्शन गरेर सबैको वाहवाही लुटेका छन् । इरियोन नाइटन नाम गरेका अमेरिकाको फ्लोरिडा राज्यका १७ वर्षे धावकले १०० र २०० मिटर दौडमा चमत्कारिक प्रदर्शन गरेपछि टोकियो ओलम्पिकमा स्वर्ण पदक जित्ने अपेक्षा गरिएको छ । अमेरिकाको खेलकुद क्षेत्रमा आइतवार उनले देखाएको प्रदर्शनपछि उनको चरित्चर्चा हुने गरेको छ । सन् १९६४ पछि ट्रयाक एण्ड फिल्डमा यति कम उमेरका खेलाडी सहभागी हुने भएको यो पहिलोपटक हो ।
उनी वाधादौडका खेलाडी हुन् । वाधादौडमा संसारका सवैभन्दा चर्चित धावक उसिन वोल्टको कीर्तिमानलाई भंग गरेर उनी एकाएक चर्चामा आएका हुन् । आइतवार टोकियो ओलम्पिकका लागि ओरेगन राज्यको युजिनमा आयोजना गरिएको २०० मिटरको परीक्षणमा उनले १९ दशमलव ८४ सेकेण्डमा उक्त दूरी पूरा गरी तेस्रो स्थान प्राप्त गरेका थिए । हाल १८ र २० वर्षभन्दा मुनिको उमेर समूह अन्तर्गत २०० मिटर र १०० मिटर दौडमा उनको कीर्तिमान छ । १०० मिटर दौड उनले १० दशमलव १६ सेकेण्डमा पूरा गरेका थिए ।
नाइटनले उसिन वोल्टले युवा कालमा राखेका २०० मिटरका दुइवटा कीर्तिमान भंग गरिसकेका छन् । वोल्टले सन् २००३ र २००४ मा कायम राखेको १८ र २० वर्षभन्दा मुनिको समूहको कीर्तिमानलाई भंग गरेका थिए
स्कुल स्तरमा अमेरिकी फुटबलमा सहभागी नाइटनले फुटबलका प्रशिक्षकहरुकै कारण वााधादौडमा करिब दुइ वर्ष अघिमात्र पाइला चालेका हुन् । छ फिट तीन इन्च उचाइका नाइटनको एक सय ७० पाउण्ड तौल छ ।
नाइटनको दौडप्रति लगाव छ । उनी भन्छन् दौडमा जीवनको सफलता नितान्त मेरो हातमा छ र मलाई थाहा छ, म यो गर्न सक्छु । उनले आफ्नो इन्टग्राममा राखेका छन् मलाई मेरो महत्ता थाहा छ, मैले आफ्नो प्रतिविम्व देखेको बेलामा आफूलाई महान् देख्छु । हाल उनी इम्पोसिवल इस नथिंग भन्ने व्राण्डका हिस्सेदार हुन् ।
जापानको टोकियोमा आगामी जुलाई २३ तारिखदेखि ओलम्पिक खेल आयोजना हुँदैछ । यो खेलमा उनको प्रदर्शन कस्तो हुनेछ, त्यो त समयले नै बताउनेछ ।
(खनाल पूर्व गाेरखापत्रकर्मी तथा हाल अमेरिकामा क्रियाशील पत्रकार हुनुहुन्छ।)
