काठमाडौँ, माघ १७ गते । राष्ट्रिय महिला भलिबल टोलीमा रोजाईकी स्पाइकर सरस्वती चौधरी कम्तीमा ६ महिना कोर्ट बाहिर रहनु हुने भएको छ । बंगलादेशमा हालै सम्पन्न एभिसी सेन्ट्रल जोन महिला भलिबल च्याम्पियनसिपको फाइनल खेलको क्रममा बायाँ घुँडामा चोट बोक्नुभएकी चौधरीको सोमबार घुँडाको शल्यक्रिया गरिएको छ ।
च्याम्पियनसिपमा नेपाल पहिलो भएको थियो । सरस्वतीको सशस्त्र प्रहरी बलको बलम्बुस्थित अस्पतालमा शल्यक्रिया गरिएको हो । उहाँ विभागीय टोली सशस्त्रकै खेलाडी हुनुहुन्छ । सरस्वतीको शल्यक्रियामा सामेल सर्जिकल अर्थोपेडिक विभागका डा. शैलेन्द्र श्रेष्ठ लगायतको चिकित्सक टोलीले सरस्वतीलाई खेलमा फर्कन ६ महिनाभन्दा बढी समय लाग्ने जानकारी दिनुभयो ।
बंगलादेशमा चोट बोकेर फर्किएपछि पनि सरस्वतीले पोखरामा पुर २६ देखि माघ १ गतेसम्म सञ्चालित टाइगर कप भलिबल खेल्नुभएको थियो । एपिएफलाई टाइगर कप उपाधि दिलाउन मुख्य भूमिका निर्वाह गर्नुभएको उहाँ प्रतियोगिताकै सर्वोत्कृष्ट खेलाडी समेत हुनुभएको थियो । नेपाली महिला राष्ट्रिय भलिबल टोलीले हात पारेको पछिल्ला ठूला अन्तर्राष्ट्रिय उपलब्धिहरुमा सरस्वतीको महत्वपूर्ण योगदान रहेको छ ।
