काठमाडौँ, फाल्गुन ४ गते । विभागीय टोली नेपाल आर्मी क्लब लामा टेन्डी शेर्पा स्मृति खुला बास्केटबल प्रतियोगिताको पुरुषतर्फ क्वार्टरफाइनलमा प्रवेश गरेको छ । समूह ‘बी’ को लिग खेलमा आर्मीले बुधबार शंकरदेव क्याम्पसलाई ११३–५६ ले हरायो ।
आर्मीका सौरव श्रेष्ठ र शंकरदेवका राजेश ठकुरीले समान १८ अंक बनाउनुभयो । आर्मीको जितसँगै यो समूहमा रहेको अर्को टोली ड्रिम टिम पनि क्वार्टरफाइनल पुगेको छ । त्रिपुरेश्वरस्थित राष्ट्रिय खेलकुद परिषद्को कभर्डहलमा भएको पुरुषकै अर्को खेलमा कीर्तिपुरले एचआईके भिजनलाई ७८–५९ ले हरायो । कीर्तिपुरका लागि सुरज खड्गीले १७ स्कोर गर्दा एचआईकेका विजय लामाले १६ अंक बटुल्नुभयो ।
यसैगरी महिलातर्फ राउन्ड रोविन लिगमा ललितपुर हाइले कीर्तिपुरमाथि ९३–२८ को सहज जित निकाल्यो । ललितपुरकी एलिना गुरुङले १५ तथा कीर्तिपुरकी झरना वज्राचार्यले १८ स्कोर गर्नुभयो ।
